Magbinuakay na sab og tabla ang host Oklahoma City Thunder ug Indiana Pacers sa ilang panagsangka og balik alang sa Game 5 sa National Basketball Association (NBA) Finals karong Martes sa alas 8:30 sa buntag, Hunyo 17, 2025 (PH time), sa Paycom Center.
Ang Pacers maoy nakauna pagposte og daog sa series dihang ningbangon sila gikan sa pagkalubong aron pakagingon ang inilog nga Thunder sa Game 1, 111-110, diin nibida ang buzzer-beater ni Pacers All-Star guard Tyrese Haliburton ning mao nga venue.
Sa Game 2, bangis nga ningbawos ang Thunder, 123-107, aron tablahon ang best-of-seven nga kombati.
Sa pagtapon sa series sa korte sa Pacers nga mao ang Gainbridge Fieldhouse sa Game 3, gibawsan pagmakmak sa Pacers ang Thunder, 116-107, atubangan sa hidlaw nilang mga sumosunod nga karon pa personal nga nakasaksi pagbalik og duwa sa finals gikan niadtong tuig 2000.
Sa Game 4 nga gipahigayon gihapon sa balwarte sa Pacers, gitabla na sab sa Thunder ang series pinaagi sa pagposte og 111-104 nga kadaugan.
Karon nga best-of-three na lang ang kombati, magpadayon kaha ang pulipuli pagdaog nga dagan sa series?
Kini maoy ika-32 nga higayon nga nagtabla ang finals human sa upat ka duwa.
Sa niaging 31 ka mga okasyon, sulod sa 23 ka higayon nga ang ningdaog sa Game 5 mao ang nahimong kampiyon.
Nagpasabot nga grabe kamahinungdanon kining kombatiha.
“We are both two games away,. Anything can happen here,” matod ni Haliburton nga napatik sa AP News.
Ang lider sa Thunder nga si MVP Shai Gilgeous-Alexander niingon nga wala ra siya maghunahuna og maayo ug nagpasalamat lang siya nga nakaabot siya ning puntoha nga maoy labing una niyang kasinatian sa finals.
“I think above all, it’s been very fun,” matod ni Gilgeous-Alexander. “It’s been everything I dreamt it to be growing up. There’s no other place in the world I’d rather be, and I’m grateful to be here. Thankful for the experience, for sure.” / Gikan sa wires