DUNA na’y dugang kapilian ang mga sumasakay sa pagbiyahe gikan ug padulong sa Cordova ug Cebu City agi sa Cebu-Cordova Link Expressway (CCLEX), human gipakatap ang tulo ka modernong public utility jeepneys (MPUJs).
Kining mga MPUJ, sakop sa Lapu-Lapu Cebu Transport Terminal Operators and Drivers Cooperative (Lactodco), nagtabok sa rota nga SM Seaside-Cordova agi sa CCLEX.
Matod ni Lactodco chairman Kenn Kangleon, nagsugod ang bag-ong pampublikong transportasyon sa designated nga mga ruta niadtong Hunyo 2, 2025, sa pletehan nga P40 matag pasahero.
Si Kangleon, nga personal nga nag-pilot-test sa mga sakyanan, niingon nga ang mga pasahero nga mobiyahe gikan sa SM Seaside pabalik sa Cordova maka-save sa bag-ong serbisyo sa transportasyon.
“Makadaginot na karon ang mga pasahero kay sauna wala man direkta nga sakyanan gikan Cordova padulong Seaside. Mag-taxi pa sila unya mobayad og P90 (toll fee) para sa CCLEX. Karon, P40 nalang ang ilang bayranan sa tibuok biyahe,” matod ni Kangleon.
Dugang niya, nagsugod na sa pag-improve ang gidaghanon sa mga pasahero padulong sa SM Seaside, nga usahay moabot og duha ka biyahe.
Hinuon di pa kaayo daghan ang mga pasahero, apan nagtuo si Kangleon nga modaghan ang demanda sa higayon nga magsugod na usab ang klase.
Ang designated terminals alang sa rota nahimutang sa SM Seaside Tower Garden ug sa Barangay Bangbang, Cordova, ug Purok 5 Star sa Barangay Babag, Lapu-Lapu City.
Ang operating hours mao kining mosunod: Cordova Terminal: alas 6:30 sa buntag hangtod alas 7 sa gabii
SM Seaside Terminal: alas 10:00 sa buntag hangtod alas 9:00 sa gabii, subay sa oras sa mall ug Lapu-Lapu Terminal: alas 5:30 sa buntag hangtod alas 7 sa gabii.
Ang prangkisa alang sa mga public utility vehicles, gihatag pinaagi sa bidding process nga gipahigayon sa Land Transportation Franchising and Regulatory Board sayo pa niadtong Enero, nagtugot sa kinatibuk-an nga 15 ka unit.
Matod sa Lactodco chairman, ang nahabilin nga mga unit, nagkantidad og mga P3 milyones matag usa, paliton pinaagi sa dugang mga order isip kabahin sa gradual rollout aron matubag ang nagkadakong panginahanglan alang sa modernong pampublikong transportasyon. / DPC