Moabot sa 141 ka mga kaso sa leptospirosis ang natala sa tibuok Central Visayas gikan sa Enero hangtod sa Agusto sa 2025.
Kini maoy gipahibalo ni Dr. Neil Erasmo, officer-in-charge sa Department of Health (DOH) Central Visayas sa Agusto 6, 2025.
Matod ni Erasmo nga nabantayan ang pagsaka sa kaso gumikan sa sunodsunod nga kalamidad sa nasod nga niresulta sa kusog nga pag-uwan ug pagbaha.
Ang leptospirosis makuha gikan sa ihi sa hayop ilabi na sa ilaga nga gitawag og leptospira nga usa ka kagaw.
Kon ang tawo nga dunay samad o garas sa panit nga motaak sa baha ug ma-expose sa maong bakterya, moresulta kini sa pagkaangkon sa maong sakit.
Dugang ni Erasmo nga sagad sa mga kaso natala sa Dakbayan sa Sugbo ug Mandaue nga may taas nga tsansa sa mga pagbaha.
Walay natala nga namatay sa maong sakit apan gitambagan ang publiko nga modangop dayon sa duol nga tambalanan ugaling dunay masinati nga simtomas. / ANV