Sa ikatulong higayon, misalmot na sab ang usa ka 20-anyos nga adunay autism nga manlalangoy gikan sa Munisipyo sa Liloan, Cebu sa 63rd Palarong Pambansa nga gisugdan niadtong Hulyo 29, 2023 sa Marikina, Metro Manila.
Si Laurace “Mader” Yuson, usa ka atleta nga na-diagnose og autism spectrum disorder (ASD) sa edad nga siyete, maoy usa sa mga morepresentar sa Rehiyon VII ubos sa Para Games category sa usa ka semana nga kompetisyon.
“Si Laurace usa na siya ka maayo nga atleta ug manlalangoy. Dili nako mapugngan ang pagdayeg sa iyang panaw. Namatikdan dayon nako ang iyang dakong potensyal niadtong 15-anyos pa lang siya,” matod ni Jovylyn Hallasgo, kanhi swimming coach ni Yuson.
Bisan sa iyang kahimtang, wala mapakyas si Yuson sa paghatag sa tanan niyang makaya alang sa paghakot og daghang gold medals sa lain-laing mga sports competitions nga iyang giapilan.
Nasinati ni Yuson ang iyang unang Palarong Pambansa niadtong 2018 sa Vigan, Ilocos Sur, nasundan kini sa University of the Philippines (UP) Sports Complex sa Mintal, Davao niadtong 2019.
Apil sab unta si Yuson sa 2020 nga edisyon apan nakanselar kini tungod sa COVID-19 outbreak.
Dugang pa ni Hallasgo, ang determinasyon ug kugi ni Yuson mao ang nag-unang hinungdan nga naka-qualify siya sa national competition.
Sa 2018, 2019, ug 2023 editions sa Central Visayas Regional Athletic Association (CVIRAA), 11 ka gold medals ang nahakot ni Yuson sa kinatibuk-an gikan sa nagkalainlaing events.
Taliwala sa iyang mga kalampusan sa paugnat sa kusog, wala gihapon nakalikay si Yuson sa diskriminasyon.
“Ang diskriminasyon sa pagkabaldado sa sports usa ka dili maayo nga kamatuoran. Apan si Laurace nipadayon ug swerte nga nakakita og panaghigalaay ug suporta gikan sa usa ka regular nga atleta nga mitabang kaniya sa paglangoy,” ingon ni Hallasgo.