BISAN nga gipanglabay na mapuslan gihapon ang mga basura nga nakolekta sa sapa nga utlanan sa Barangay Subangdaku, Mandaue City ug Barangay Mabolo, Cebu City.
Nipahigayon og trash collection operation ang Solid Waste Management team sa Subangdaku, Mandaue City niadtong Martes, Marso 25, 2025.
Atol sa operasyon, nagsagol nga basura nga nibara sa maong sapa ang nakuha diin ilang i-segregate ug kadtong mapuslan o ma-recycle ug mabaligya ilang gilahi.
Ang mga nakolekta nga basura nga ilang ibaligya ug ang kita niini ilang tigumon aron nga magamit sa pagpamalit og food packs, regalo ug uban pa alang sa mga kabus nga pamilya sa barangay atol sa Pasko.
Ang clean-up drive magpadayon hangtod na sa buwan sa Disyembre 2025.
Ang lokal nga opisyal nanghinaot nga mamahimong modelo ang ilang inisyatiba ngadto sa uban komunidad nga nag-promote og husto nga waste management dungan na sa paglimpyo sa palibot. / Juan Carlo De Vela