Gilauman nga adunay madugang nga mga school buildings, maayo ang mga guba nga classrooms, dugang school supplies, mga libro ug magtutudlo sa mga pampublikong tunghaan sa Probinsiya sa Sugbo.
Kini maoy gipahibalo ni Atty. Joseph Felix Mari ‘Ace’ Durano sa mga tigbalita sa Huwebes, Hulyo 31, 2025, subay sa moabot P1 bilyon nga pundo nga nasuta nga anaa sa trust fund sa probinsiya nga gitagana alang sa programa sa edukasyon sa probinsiya.
Matod ni Durano nga ang kapin sa P1 bilyon nga pundo gahin gikan sa Real Property Tax.
Matag tuig ang gigahinan og moabot sa P600 milyunes nga pundo ang programa sa edukasyon sa probinsiya.
“Kini importante ni ilabi na nga nahibalo ta unsay kuwang sa atong mga public schools. Kini nga pundo magamit alang sa school buildings, repair of school building, school supplies para sa mga maestra ug estudyante, hiring of teachers, feeding program,” matod ni Durano.
“So, kinahanglan lang gyud nga i-convene ang school board unya aprubahan sa school board ang expenditure program. So, walay limit pilay magamit ani sa usa ka tuig,” dugang pa niya.
Ang maong pundo walay expiration, pasabot nga mahimo kining gastuhon alang sa pagsugod na sa pagpaayo.
Apan aron magamit ang maong pundo, gikinahanglan nga mosumiter og detalyadong report ug rekomendasyon ang Department of Education (DepEd) Cebu Province aron masusi sa school board kon maayo ba nga ipatuman ang nalatid niining mga programa, ug gastuhanan. / ANV