USA ka Vietnamese national ug laing 11 ka empleyado ang gipangdakop atol sa gilusad nga entrapment operation sa mga sakop sa Regional Special Operations Unit 7 sa pagpangulo ni Police Lieutenant Colonel Wilfredo Taran, Jr., sa pakig-alayon sa Regional Intelligence Unit 7 ug City Mobile Force Company, sa usa ka beauty clinic nga nahimutang sa Centro Maximo Building, Jakosalem Street, Barangay Cogon Central Ramos, Siyudad sa Sugbo niadtong Sabado, Hulyo 19, 2025.
Ang maong beauty clinic giingong nalambigit sa ilegal nga aesthetic procedures kon pagpa-enhance sa panagway sa ilang mga kustomer nga walay permit nga usa ka kalapasan sa Republic Act 9711 kon (FDA Act of 2009) ug Republic Act 2382 (Medical Act of 1959).
Ang Police Regional Office 7 nakadawat og reklamo gikan sa usa ka civilian nga nagkanayon nga ang maong clinic nag-operate nga walay lisensya sa ilang beauty enhancement procedures.
Giingon nga usa sa mga reklamante nagpa-enhance sa iyang ngabil apan imbes nga monindot nahiwi na hinuon kini.
Wala usab matod pa kini makapakita sa brand sa produkto nga ilang gigamit.
Tungod niini, dali nga niaksyon ang PRO 7 pinaagi sa paggamit og police asset nga nagpaila nga kliyente ug ni-request nga magpa-lip filler treatment.
Giatiman gilayon ang maong police asset sa usa ka staff nga wala matino kon kini lisensyado ba nga doctor o nurse nga maoy hinungdan nga gihimo dihadiha ang entrapment operation ug gisikop ang mga tawo sa sulod sa clinic.
Nakuha sa mga operatiba ang duha ka syringes nga dunay sulod nga lip filler substances, nagkalainlaing vials, ampules, tabletas, capsules, usa ka RF intensify machine ug usa ka Darme Shine Pro machine.
Ang maong clinic wala usab makapakita og accreditation gikan sa Food and Drug Administration (FDA) nga maoy gikihahanglan alang sa ilang medical cosmetic services.
Ang 12 ka suspek lakip na niini ang usa ka Vietnamese national ang gipangkustodiya sa Regional Police Security and Protection Unit 7 alang sa booking ug documentations sa pagpasaka og kasong criminal ngadto sa korte.
Kon mapamatud-ang sad-an sa kasong kalapasan sa Republic Act 9711 kon Food and Drug Administration (FDA) Act of 2009, hayan pagkabilanggo sulod sa usa ngadto sa 10 ka tuig ug multa nga mobalor sa P50,000 ngadto sa P500,000 ang ilang atubangon.
Kadtong makombikto ubos sa Republic Act 2382 subay sa unauthorized medical practice mahimong masilotan sa pagkabilanggo sa dili moubos sa usa ka tuig ug dili molapas sa 5 ka tuig o kaha multa.
Si Police Brigadier General Redrico Maranan, ang hepe sa PRO 7, midayeg sa iyang mga personnel sa pagkasikop sa mga nalambigit sa ilegal nga kalihukan.
“This operation demonstrates our unwavering commitment to respond to public complaints and verified information. We will continue to go after unlicensed and illegal activities that put public health at risk. We encourage the community to remain vigilant and work hand in hand with us in safeguarding the welfare of every citizen,” matod ni Maranan. / AYB