Gisalikway sa Armed Forces of the Philippines (AFP) ang labing bag-ong pasangil sa Embahada sa China kalabot sa BRP Sierra Madre sa Ayungin Shoal ug gipahayag niini nga walay nabugkos nga kasabutan sa pagtangtang sa grounded nga barko sa Philippine Navy gikan sa maong dapit.
Sa usa ka pahayag niadtong Sabado, Agusto 22, 2026, ang tigpamaba sa AFP alang sa West Philippine Sea (WPS) nga si retired Rear Adm. Roy Vincent Trinidad niingon nga gisulayan sa Beijing nga “usbon ang kasaysayan” samtang gikalimtan ang giingon sa militar nga rekord sa China sa paggamit og mga bakak nga estorya sa WPS.
“The AFP rejects the recent statement from the Chinese Embassy in Manila attempting to rewrite history regarding the presence of the BRP Sierra Madre at Ayungin Shoal,” matod ni Trinidad.
Gitumbok niya ang pag-okupar sa China sa Panganiban Reef, nga nailhan usab nga Mischief Reef, niadtong 1995.
Sa sinugdanan, gihulagway sa China ang mga estruktura nga gitukod didto isip mga dalangpanan sa mga mangingisda ug niingon nga wala kini katuyoang militar, sumala pa ni Trinidad.
Apan ang maong mga estruktura nahimo na karong usa ka dako nga instalasyon militar nga adunay airstrip, mga pasilidad sa radar, ug imprastruktura sa naval.
“Mischief Reef stands as a permanent, concrete monument to their deceptive strategy in the West Philippine Sea,” batbat ni Trinidad. / PNA
