BABAYE nga mamaligya og ticket sa lotto apan nag-sideline sab sa pagpamaligya og shabu ang nadakpan sa buy-bust sa mga sakop sa Philippine Drug Enforcement Agency (PDEA) Mandaue City Team uban sa Regional Intelligence Unit 7 ug Mandaue City Police Office station 3 sa M.C Briones Street, Barangay Paknaan, Siyudad sa Mandaue sa Huwebes, Agusto 14, 2025.
Ang suspek giila ni PDEA 7 Regional Director Joel Plaza nga si alyas Anabelle, 39, lotto outlet operator ug residente ra sab sa maong lugar.
Nakuha gikan kaniya ang usa ka pakete sa gituohang shabu nga motimbang og .20 gramos nga adunay estimated average market value nga P1,360. Matod ni Leia Alcantara, information officer sa PDEA 7, tulo ka semana nga gipaubos sa case buildup ang maong suspek human nila nadawat ang impormasyon gikan sa kasaligang tinubdan.
Giingong makabaligya si Anabelle og 50 gramos nga shabu matag semana gikan sa iyang suplayer.
Base sa nakuha nga report sa PDEA 7, kasagaran sa mga customer sa suspek magpatuo nga mopalit og numero sa lotto apan diay mopalit kini og ilegal nga drugas.
Sa tapad sa lotto outlet mao ang iyang sarisari store apan ang iyang suplay sa illegal drugs naa sa lotto outlet.
Base sa pamahayag sa informant sa PDEA 7, usa ka tuig na ning maong negosyo ni Anabelle diin ang iyang customer mo-text daan sa cellphone aron mo-order og shabu ug kuhaon na lang kini sa lotto outlet.
Inig kuha sa shabu, giputos na kini sa ticket sa swertress.
Gipaubos na sa imbestigasyon sa PDEA 7 ang maong suspek aron masuta kon kinsa ang suplayer niini og ilegal nga drugas.
Giandam na ang kasong kalapasan sa Section 5 ug 11, Article II, Republic Act 9165. batok sa suspek. / AYB