Giila nga high value individual ang nadakpan sa mga sakop sa Special Operations Unit (SOU) 7 sa PNP Drug Enforcement Group sa pakig-alayon sa Philippine Drug Enforcement Agency 7 atol sa gilusad nga buy-bust sa Sitio Laray, Barangay Guadalupe, Siyudad sa Carcar, alas 8:23 sa gabii, Lunes, Hulyo 7, 2025.
Ang nasikop giila nga si Jojie Nuico, 42, ahente sa usa ka liquefied petroleum gas (LPG) nga kompanya nga taga Barangay Tinago, Dakbayan sa Dumaguete, Negros Oriental.
Nakuha sa mga operatiba ang mga dagkong putos sa gituohang shabu nga motimbang sa 300 gramos nga dunay standard drug price nga P2,040,000.
Matod sa SOU 7 nga nakadawat sila og report gikan sa usa ka kasaligang tinubdan nga ang maong suspek mohagbong og binulto nga suplay sa ilegal nga drugas sa Dakbayan sa Carcar.
Tungod niini, ila ning gimonitor hangtod nga nakumpirmar ang ilegal nga negosyo niini.
Human makuha ang tanang impormasyon ug contact niini, gilusad dayon ang buy-bust nga niresulta sa pagkasikop sa suspek.
Sa gihimong pakisusi sa mga imbestigador, ang suspek matod pa nitug-an nga makabaligya siya og usa ka kilo
nga shabu matag usa ka buwan.
Ang iyang area of distribution mao ang tibuok habagatang bahin sa Probinsiya sa Sugbo lakip na sa Dakbayan sa Dumaguete. / AYB