Naghari ang panagpares nila ni Lapu-Lapu City Mayor Junard “Ahong” Chan ug Michael Pitalcoren sa C Plus category sa 2023 Lapu-Lapu City Fiesta Lawn Tennis Tournament ning bag-uhay lang sa Lapu-Lapu City Tennis Court.
Ning dalan nga ilang gisubay paingon sa kampyunato, gipangbuntog nila ni Chan ug Pitalcoren ang panagpares nila ni Bong Veloso ug Tomas Morgia sa labing una nilang tahas.
Gisundan nila ang laing kadaugan batok sa panagpares nila ni Fr. Reynante G ug JoJo Rosales, Jun Espinosa ug Johnriel Espinosa, ug Richard Versaga ug Warly Vistal.
Giselyo nila ni Chan ug Pitalcoren ang ilang pagkahimong kampyon pinaagi sa pagbuntog sa panagpares nila ni Dr. Mark Guinocor ug Joey Herrera sa katapusan nilang tahas.
Ang ubang panagpares nga ningkampyon mao sila si Popoy Salcedo ug Tonyo Selma sa seniors category, Daiseki Casiano ug Reymier Dungog sa “C” Minus category, Jm Zialcita ug Johnrobert Laña sa “C” division, Niel Limpangog ug JR Acebes sa “B” division, ug Jr Acebes ug Jerson Norido sa “B” Minus category.
Nahimong hapsay ang pagpadagan sa kompetisyon sa paggiya ni Fiscal Ruso Zaragosa, kinsa maoy committee chairman.
Nag-abag ni Zaragosa mao sila si city councilor Janvi Dela Serna ug sports commissioner Vince Chan-Carungay.