Nabuslot ang windshield sa air-conditioned Ceres bus dihang gilabay og bato sa paglabay sa national highway sa Brgy. Pasol, lungsod sa Alcoy, pasado alas 4 sa kaadlawon, Sabado, Hunyo 29, 2024.
Hinuon, walay naapektohan sa mga pasahero sa bus nga ginamaneho ni Ramonito Amar, 44, ug taga Barangay Poblacion, lungsod sa Dalaguete.
Si P/Capt. Jerry De Castro Magsayo sa kapulisan sa Alcoy nihimo og pakisusi ug nasayran nga usa sa mga sakay sa tulo ka motorsiklo maoy nibato sa bus.
Sumala sa kapulisan, ang bus gikan sa Brgy. Bato, lungsod sa Oslob sa habagatan ug nagbiyahe padung sa siyudad sa Sugbo.
Dugang sa kapulisan, ang bus dunay gikasugat na tulo ka mga motorsiklo ug kalit lang dunay nipaka nga bato sa windshield hinungdan sa pagkabuak sa bildo.
Atol ning pagsuwat, wala masayri ang danyos sa windshield sa bus. / DVG