Nasikop ang usa ka akyat bahay human makita ang iyang panagway sa CCTV camera sa balay nga iyang gikawatan alas 7:28 sa gabii, Dominggo, Hunyo 22, 2025, sa Barangay Booy, Siyudad sa Tagbilaran, Probinsiya sa Bohol.
Matod ni Police Lieutenant Colonel John Kareen Escober ang hepe sa Tagbilaran City Police Station nga pag-abot sa magtiayon nga tag-iya sa balay ilang nabantayan nga naguba na ang sliding door ug sa kusina.
Ang mga biktima dili lang magpahingalan alang sa ilang siguridad sa kahadlok nga balikan sa mga kauban sa nadakpan. Sa pagsusi sa ilang mga butang, nadiskobrihan nga nawala na ang ilang kuwarta ug pipila ka alahas.
Dali nga gisusi ang CCTV footage ug ilang naklaro ang panagway sa tawo nga maoy naghimo sa krimen.
Nailhan nila ang suspek nga si Jesus Andal Jr. nga nagpuyo ra sab sa maong barangay.
Alas 10:50 sa gabii ang magtiayon diha pa nanawag sa mga polis sa Tagbilaran ug nipahibalo nga nabiktima sila sa akyat bahay.
Niresponde dayon ang mga personnel sa Theft and Robbery Section ug nisusi sa dagway sa suspek dungan sa gilusad nga manhunt.
Pagka alas 12:35 dul-an duha ka oras human ni-report ang magtiayon nadakpan sa kapulisan ang suspek ug nabawi ang P33,000 nga nakuha nga kuwarta lakip na ang nakawat nga alahas.
Ang suspek kasamtangan nga gikustodiya sa Tagbilaran City Police Station ug gipasakahan na og kasong pagpangawat. / AYB