Napilde man tuod ang Alas Pilipinas sa kamot sa powerhouse Vietnam, sa straight sets, 25-15, 25-17, 25-14, sa finals sa 2025 AVC Women’s Volleyball Nations Cup niadtong Biyernes sa gabii sa Dong Anh Gymnasium, apan nagpakita kini og dako nga kahayag sa Philippine volleyball.
Wala na hatagi og kahigayonan ang PH women’s volleyball team nga makaporma sa tibuok duwa samtang mipatigbabaw ang depensang kampiyon nga Vietnam pinasikad sa ilang duha ka beteran nga si Tran Thi Thanh Thuy ug Thi Bich Tuyen Nguyen. Nisutoy ang Vietnam sa ikatulong sunodsunod nga korona sa maong torneyo.
Ang pagsulod pa lang sa Pilipinas sa Finals nakahimo na og kasaysayan kay mao kadto ang unang higayon nga nahitabo sulod sa unom ka dekada.
Bisan pa sa kapildihan, nakab-ot gihapon sa Alas Pilipinas ang ilang labing taas nga finish sa AVC competition.
Ang Nationals misulod sa semifinals isip No. 1 seed sa Pool B ug mipilde sa Chinese Taipei sa usa ka bangis nga five-set match, 25-17, 25-21, 18-25, 15-25, 15-13, aron makasulod sa championship match. (RSC)