Human sa unom ka dekada, nakasulod na gyud sa unang higayon ang Alas Pilipinas Women sa finals sa usa ka AVC-sanctioned indoor volleyball tournament — usa ka makasaysayanong milestone sa Philippine volleyball.
Gibuhat kini sa Pilipinas human sa usa ka thrilling nga 25-17, 25-21, 18-25, 15-25, 15-12 nga kadaugan batok sa Chinese-Taipei sa semifinals sa 2025 AVC Women’s Volleyball Nations Cup didto sa Dong Anh Gymnasium sa Hanoi, Vietnam niadtong Biyernes sa gabii, Hunyo 13.
Unang nakuha sa Pilipinas ang duha ka sets, apan nakabawi ang Chinese-Taipei ug nakapugos og deciding fifth set. Apan sa ulahi, gilatid sa determinasyon ug grit sa Alas ang ilang dalan padulong sa finals — una sa kasaysayan sukad natukod ang volleyball federation sa nasod niadtong 1960s.
Si Bella Belen nipupo og 14 puntos, 19 receptions, ug 16 digs, samtang si Angel Canino ug si Alyssa Solomon nagtampo og dako sa offense. Si Canino dunay 9 puntos, 9 receptions, ug 7 digs samtang si Solomon nidugang og 12 puntos.
Sigurado na nga makaangkon ang Pilipinas og podium finish, pero ang finals maoy una gayud sa kasaysayan sa AVC indoor volleyball alang sa nasod — lalaki man o babaye. / RSC