Ang kanhi best import nga si Devin Davis sa Alaska Milk ang mibisita sa nasud para sa usa ka mini-reunion nga gipahigayon sa maong team.
Gipangulohan sa kanhi head coach nga si Tim Cone, team manager Dickie Bachmann, ug team captain Jojo Lastimosa ang panagtapok uban sa pipila ka kanhi Milkmen aron tagaan og mainitong pagdawat si Davis, kinsa karon 50 anyos na.
Ang ilang panagtapok, napuno sa paghandom sa mga kaagi sa team nga usa sa historied franchise sa Philippine Basketball Association (PBA) ubos sa paggiya ni Wilfred S. Uytengsu.
Si Davis, nga nailhan kaniadto sa iyang iconic nga dreadlocks, maoy nagpanguna sa Alaska aron makuha ang 1998 Commissioner’s Cup title. Gikakontra nila ang San Miguel Beermen sa championship series, diin ilang gipilde si Lamont Strothers ug ang legendary coach nga si Ron Jacobs, kinsa mao na kadto ang iyang kataposang PBA finals appearance.
Naa pud sa mini-reunion sila Bong Hawkins, Rodney Santos, Poch Juinio, Kevin Ramas, ug kanhi assistant trainer Mike Braga. / RSC