Nanawagan si Konsehal Pastor “Jun” Alcover ngadto sa mga napili pagbalik ug bag-ong mga opisyal sa Kagamhanan sa Dakbayan sa Sugbo nga hatagan og dakong pagtagad ang pagpaayo sa kahimtang sa pampublikong kadalanan sa kabukiran.
Iyang giklaro nga ang dili maayo nga kondisyon sa maong mga dalan direktang nakaapekto sa kinabuhi sa mga mag-uuma ug sa ilang kapabilidad sa paghatod sa ilang mga produkto sa siyudad hilabi na panahon sa kalamidad sama sa landslide.
Sa usa ka privilege speech nga gihimo niadtong Miyerkules, Hunyo 11, 2025, gitagaan og saktong pagtagad ni Alcover ang daw napasagdan nga kahimtang sa mga komunidad sa kabukiran.
"Ang upland barangays kay murag naawahi sa kalambuan susama sa kadalanan ug uban pang pampublikong edipisyo," matod ni Alcover.
Nagpakita si Alcover og mga hulagway atol sa iyang pakigpulong sa kadalanan nga adunay mga liki sa mga barangay sa Guba ug Agsungot.
Gipakita usab niya ang usa ka makapabalaka nga video sa usa ka dalan paingon sa Agsungot, hilabi na sa pagsugod sa ting-ulan.
"Rainy season, unya dako kaayo ni’g problema sa mga lumolupyo sa kabukiran kay ang mga dalan didto kasagaran mga guba na, wala na sa ensaktong pag-atiman," pasabot ni Alcover.
Giila man tuod ni Alcover nga pipila pa lang ka mga buwan ang kasamtangang administrasyon ni Mayor Raymond Alvin Garcia apan iyang giklaro nga gikinahanglan ang dinalian nga pagtagad sa gibati sa mga komunidad sa kabukiran.
Gipahinumduman ni Alcover ang executive ug legislative branches sa Cebu City Government nga ang pagmentinar sa pampublikong kadalanan usa ka obligasyon ug mandato sa lokal nga chief executives ug tanang napiling opisyal.
"Ang akong punto lang karon tagaan og pagtagad ang kadalanan sa kabukiran sa sunod nga mga hup-ong ning bag-o ug daan nga administrasyon ning atong dakbayan," hangyo ni Alcover.
Gipresentar ni Alcover ang kritikal nga kalambigitan tali sa maayong mga dalan ug sa panginabuhian sa mga molupyo sa kabukiran.
"Atong hinumdoman nga ang mga produkto sa kabukiran maglisod og naog o deliver sa siyudad kon ang mga dalan gubaon," matod niya.
Ang pakigpulong sa konsehal nagsilbing direkta nga paghangyo sa mga napili pagbalik ug bag-ong mga opisyal nga "ipadayon ug pauswagon ang kahimtang sa pampublikong kadalanan sa kabukiran.”
Gihuman ni Alcover iyang pamahayag pinaagi sa pag-ingon nga kini nga kabalaka dili lang usa ka mandato alang sa nangagi ug kasamtangang administrasyon, apan alang sa tanang mosunod nga mga administrasyon nga kinahanglang ipadayon. / JPS