Padayon ang pagsulbong ni Filipina tennis ace Alex Eala ug iyang gibawsan si American Alycia Parks, 6-1, 4-6, 6-2, sa pagsugod sa iyang kampanya sa Womens Tennis Association (WTA) 1000 Canadian Open women’s singles kagahapon sa buntag, Huwebes, Agusto 6, 2026 (PH time), sa Sobeys Stadium sa Toronto, Canada.
Si Eala, kinsa lab-as pa sa iyang makasaysayong paglabni og kampyunato sa WTA 500 Mubadala DC Open sa Washington, naneguro ning higayuna nga dili mausab ang iyang nasinati dihang gipukan siya ni Parks human niya gidominar ang 1st set, 6-0, 3-6, 2-6, sa ilang premirong panagsangka sa 1st round sa WTA 1000 Australian Open niadtong Enero 2026.
Sama sa premiro nilang panagsangka, si Eala, kinsa bag-uhay lang nirehistro og career-high isip world No. 20, nidominar sab sa 1st set ning higayuna.
Apan nakakuha og momentum ang world No. 71 nga si Parks dihang naangkon niya ang kadaugan sa 2nd set.
Nabawi ni Eala ang momentum human siya nakalabaw, 2-0, sa deciding set apan nakatabla si Parks, 2-2.
Ning higayuna, gipagawas ni Eala ang tanan niyang kabangis ug niposte kini’g upat ka sunodsunod nga kadaugan aron hingpit nga dag-on ang hinampakay.
Sa post-game interview, gipasalamatan og maayo ni Eala ang nagpunsisok niyang mga kababayan sulod sa venue.
“I am eternally grateful. I just came off Washington, so I really feel like this is a celebration,” matod sa 21 anyos nga si Eala.
“Alam niyo, linggo-linggo ko kayo nakikita, sinusuporta ako. Linggo-linggo ko nakikita kung gaano niyo kamahal ang kapwa niyo Pinoy. Kaya proud na proud na proud na proud ako din maging Pinoy,” dugang niya.
Sa sunod niyang tahas, kontrahon ni Eala ang laing American player nga si Caty McNally, kinsa nipakaging sa kanhi Wimbledon champion ug tournament 6th seed Linda Nosková sa Czech Republic, 7-6 (5), 6-1, sa 2nd round. / ESL