Nagmangtas si Andre Caminos Cuizon ug nimugna kini og 40 puntos aron hatagan ang Aloguinsan og seguradong luna sa semi-finals pinaagi sa pagmakmak sa Malabuyoc, 119-109, ning bag-uhay lang sa Mayor Inocentes Cabaron Invitational Inter-town basketball tournament sa covered court sa lungsod sa Moalboal, Cebu.
Dala ang 4-1 nga rekord, nipatong sa ikaduhang luna sa Group A ang Aloguinsan sunod sa Dumanjug, nga adunay limpyong 4-0 nga rekord.
Napukan man tuod ang Malabuyoc apan wala sila’y angayang ikauwaw gumikan kay nakakombati gihapon sila’g insakto bisan aduna ra sila’y pito ka mga magduduwa.
Sa pagpangulo nila ni Ericson Rubio ug Joshua Soria, ang Malabuyoc nakaposte og 32-27 nga labaw sa 1st quarter.
Sa 2nd quarter, daw nag-inusarang sundalo si Soria nga nakigkombati sa Aloguinsan nga maoy hinungdan nga padayong naglabaw ang Malabuyoc, 64-61.
Apan sa 4th quarter, naglagiting na ang kainit sa duwa ni Cuizon ug yano niining giligsan ang depensa sa nangaluyang puwersa sa Malabuyoc aron ihatod ang Aloguinsan sa kadaugan.
Si Rodelio Cuba nidugang og 20 puntos alang sa Aloguinsan samtang nitunol og 15 puntos si Jerry Natinga.
Ang Malabuyoc, nga natagak sa 1-3 nga rekord, gipangulohan ni Soria pinaagi sa iyang 31 puntos.
Sa laing duwa, gipangbuntog sa Ronda ang Argao, 59-54. / ESL