Kon adunay labing bug-at nga pangagpas kabahin sa nagkaduol nga away nila ni American Terence Crawford ug Mexican Canelo Saul Alvarez, kini tingaling bag-ong gibuhian ni British Amir Khan.
Kini gumikan kay si Khan lang ang bugtong boksidor nga nakaaway ni Crawford ug hasta ni Alvarez ibabaw sa ring.
Sa usa ka feature sa Ring Magazine, nagtuo si Khan nga lupigon sa abilidad ni Crawford ang dakong bintaha ni Alvarez sa gibug-aton.
“I think he can do it. One thing about Terence Crawford, he has great boxing IQ. His IQ is so perfect that he’ll see everything,” matod ni Khan nga napatik sa Sports Illustrated.
Ang gikahinamang away ipahigayon karong Septiyembre 13, 2025, sa Allegiant Stadium sa Las Vegas, USA.
Si Khan kinsa kanhi world champion, nakig-away ni Alvarez niadtong 2016 sa T-Mobile Arena sa Las Vegas.
Niadtong higayuna, nakakombati pa og insakto si Khan sa sayong rounds gamit ang iyang kaabtik ug kumibinasyon sa mga kumo apan gihuman ni Alvarez ang away pinaagi sa makapaukyab nga 6th round knockout.
Paglabay sa tulo ka tuig, nakigharong si Khan ni Crawford sa Madison Square Garden sa New York ug nasugamak sab siya sa 6th round TKO nga kapildihan. / ESL