Gilupig ni Canelo Alvarez si William Scull pinaagi sa unanimous decision para mahimong undisputed super middleweight champion pagbalik didto sa Riyadh, Saudi, Arabia kagahapon, Mayo 4 (PH time).
Si Alvarez misulod sa away bitbit ang World Boxing Association (WBA), World Boxing Council (WBC) ug World Boxing Organization (WBO) nga mga titulo sa 168 pounds division.
Nawala ang iyang undisputed title Hulyo sa miaging tuig human siya langkati sa International Boxing Federation (IBF) belt sa iyang pagdumili sa pagdepensa sa maong bakos batok kang Scull. Si Alvarez maoy gahupot sa IBF belt sukad Nobiyembre 2021 sa iyang pagpilde kang Caleb Plant.
Gisiguro ni Alvarez nga iyang matigom pagbalik ang upat ka bakos ug dominante nga gilupig si Scull. Ang judges mihatag og iskor nga 115-113, 116-112, 119-109 tanan para sa 34-anyos nga si Alvarez.
Ang Mexican champion misaka sa record nga 63-2-2 ug 39 knockouts, ug wa pa kini mapilde sulod sa 10 ka away sa super middleweight category.
Ang undisputed nga titulo nagpasabot nga ang usa ka boksidor mao ang nagkupot sa upat ka major boxing belts nga mao ang WBA, WBC, WBO ug IBF.
Ang maong away wa makahatag sa hype nga gilaoman sa mga tawo. Ang Cuba-born fighter nga si Scull sige lang og dagan ug lihay nga maoy naka-frustrate ni Alvarez.
“It's OK, we won. We're here with the title as the champion," sigon ni Alvarez, I'm a champion. I’m a professional, so that’s all, no excuse or anything.”
Sunod kontrahon ni Alvarez mao si Terence Crawford nga ana pud sa Saudi capital gatan-aw sa duwa.
“I feel great. Crawford is one of the best out there and, you know, I like to share the ring with that kind of fighter,” dugang niini. “It’s my pleasure.” / RSC