Gipatay sa usa ka giingong drug addict ang iyang naibgan nga dalaga ug amahan niini samtang naa sa kritikal nga kondisyon ang laing babaye samtang sila nangatulog alas 4 sa kaadlawon sa Martes, Disyembre 12, 2023 sa Sitio Suba, Barangay Talavera, dakbayan sa Toledo.
Ang mga biktima nga nangamatay sa mga samad dinunggaban giila nga sila si Zorovavel Edoloverio, alyas Bobby, 48, minyo, traysikol drayber, ug ang iyang iyang anak nga si Zyphaniah, alyas Honey, 18.
Samdam sab ang amiga ni Honey nga si Gerley Navarro, 18, tinun-an sa nursing, taga Barangay Poblacion, dakbayan sa Toledo. Nasikop ang suspek nga si Kevin Purisima Avelis, 31, ulitawo, way trabaho, silingan sa mga biktima.
NISULOD
Si Police Staff Sgt. Alfredo De Gracia, Jr., imbestigador sa Toledo Police Station nga nahinabi sa Superbalita Cebu, nagkanayon nga nakasulod sa balay ang suspek agi sa kusina ug nisulod sa kwarto ni Honey samtang nangahinanok sila sa pagkatulog.
Nakamata sila si Honey ug Gerley ug nahitabo ang komosyon.
Gipangdunggab sa suspek ang mga biktima gamit ang kitchen knife apan nisukol ang mga biktima. Si Honey nisinggit ug nangayo og panabang sa iyang amahan.
Si Bobby nga nakadungog sa singgit sa anak, daling nigawas sa pikas kuwarto samtang nagbitbit og pusil, apan gisugat siya sa suspek ug gihansakan sa kutsilyo sa tiyan ug dughan.
Nakapabuto pa unta si Bobby sa iyang armas apan naunhan siya ni Avelis hinungdan nga wala na niya maigo ang suspek.
“Si Gerly, stable na, misulti nga nisukol sila sa pagsulod sa suspek sa lawak. Gihansakan sa kutsilyo sa dughan si Honey. Nahitabo ilang nilayugay pero nalupig sila sa kusog,” dugang ni De Gracia.
Human sa pagkaigo ni Honey, si Gerly gisunod, gikabay-an sa suspek, gidunggab sa makadaghan sa buko-buko.
Si Bobby nakaangkon og dili mominos lima ka mga fatal nga dinunggaban, sagad sa dughan. Sama sa iyang anak nga si Honey, naputos sa dinunggaban ang dughan, mga kamot ug ubang parte sa lawas.
Si De Gracia niingon nga sabog pa sa ginadiling drugas si Avelis dihang ilang nasikop.
Bisan kon wala ma drug test, matod sa polis nga makita sa iyang physical appearance nga bangag sa drugas.
Karon lang tuiga gireklamo si Aviles sa pamilyang Edoloverio og trespassing, kay nisulod sa ilang panimalay.
Gikataho nga makadaghang higayon nga nangawat og kwarta sa panimalay sa biktima ang suspek. Giingong maniid kini kon magpadala’g kwarta ang asawa sa biktima nga atua sa Kuwait.
“Kanang na-ibog siya ni Honey ug maguwang nga si Sweetie. Unya dili man siya type kay pulos man diay tomboy ni sila, naglagot ang suspek,” tug-an ni De Gracia.
Matod pa nga naburyong ang suspek kay dili siya tagdon sa mga biktima. Tulo ka mga magsuon ang mga Edoloverio, ang lalaki nagtrabaho sa dakbayan sa Naga.
Gani ang mga ginikanan ni Aviles gisultihan sa ilang amahan nga ipahipos ang suspek kay dili na insakto sa pangisip.
Kasong double murder ug frustrated murder giandam sa kapulisan batok sa suspek.
Ang suspek niangkon sa krimen apan wala na mohatag og dugang mga detalye.