Diyes anyos nga dalagita nipapriso sa iyang amahan nga iyang gipasanginlang nisagpa ug gidagmalan sa sulod sa ilang panimalay sa Barangay Mabolo, Siyudad sa Sugbo niadtong Miyerkules sa hapon, Agusto 5, 2026.
Natanggong sa Mabolo Police Station ang suspek nga giila lang sa alyas nga Ralph, 33, usa ka tattoo artist.
Ang biktima usa ka Grade 4 pupil ug kinamaguwangan sa tulo ka magsuon.
Subay sa imbestigasyon sa kapulisan, nitug-an ang biktima nga gisugo siya sa iyang amahan nga maghugas sa mga plato. Apan samtang naghugas, gisigehan siya og balikas ug gisultian og sakit nga mga pulong sa iyang amahan.
Matod sa bata nga kaupat siya gisagpa sa suspek ug gilusi pa ang iyang dunggan.
Naabtan sa inahan ang maong hitabo hinungdan nga dali silang nangayo og tabang sa mga opisyal sa barangay nga niresulta sa pagkasikop sa bana.
Sa pakighabi sa Sunstar SuperBalita, niangkon ang suspek sa pagpasakit apan gihimakak niini ang pasangil nga gisagpa niya ang iyang anak.
“Disiplina ra to akoa, Ma’am, pero hinay ra man. Naglagot man gud ko kay gipatuon nako pero gaduwa ra diay sa selpon. Mao to sa akong kalagot, gipitkan nako iyang dunggan niya gipahugas nako sa plato,” matod sa suspek.
Dugang sa suspek, naandan na niya nga pitkan o labtikan ang dunggan sa anak kon magpabadlong kini, apan gipadayag niini nga wala niya gihimo ang pagsagpa.
Bisan pa sa panalipod sa amahan, gusto sa bata nga magpabilin sa prisohan ang iyang amahan samtang giandam na ang pormal nga kaso batok sa suspek. / JDG
