Nalandig sa tambalanan ang amahan human siya gibunalbunalan og bangko sa iyang anak nga nasuko nga iyang giyawyawan alas 3 sa hapon sa Lunes, Mayo 19, 2025, sa Sitio Suba, Barangay Poblacion, Lungsod sa Argao.
Si Ali Secretaria, 75, pabiling giatiman sa mga doktor sa Isidro C. Kintanar Memorial Hospital sa Barangay Bogo, Lungsod sa Argao.
Ang biktima naglisod sa pagginhawa tungod sa kasakit sa iyang kalawasan ug bun-og sa ulo.
Ang iyang anak nga si Arnel, 42, ulitawo, wala magmahay sa iyang gibuhat og dili sab siya mangayo og pasaylo.
“Akoa na nga gituyo aron maka-realize siya sa iyang bati nga dinad-an nako! Tiguwang lagi og lawas pero iyang utok og batasan maldito,” matod ni Arnel.
Ang inahan nga si Lucena nga nahinabi sa mga tigbalita, nagkanayon nga kanunay nga makasab-an sa iyang bana ilang anak kay nagtuo sila nga mibalik kini sa bisyo.
Apan ang anak nga putong ug hilumon kalit nga nikuha og monobloc chair og gibunalan sa makadaghan’g higayon ang iyang amahan.
Matod ni Lucena nga iyang gibadlong ang iyang anak apan wala kini mopatuo hinungdan nga nagrabehan ang iyang bana.
Ang biktima nibutyag sa mga tigbalita nga ipadayon niya ang kaso batok sa iyang anak.
Gusto niya nga maleskyon kini sa iyang nahimong sayop.
Ang suspek nipadayag nga natulog siya dihang saba kaayo ang iyang amahan.
Matod niya nga wala na siya makaagwanta sa pagpunay og yawyaw sa iyang amahan.
Dugang niya nga kanunay nga ibalikbalik sa iyang amahan ang nahitabo kaniya nga nadakpan sa ilegal nga drugas niadtong 2009.
Sumala pa niya nga sukad nakagawas siya sa prisohan wala na siya magbisyo.
Apan maglagot siya sa iyang amahan kay magsige og yawyaw kabahin niini.
Gawas pa manabi sa ilang silingan nga nagbisyo siya. / GPL