Nakabsan sa kinabuhi ang usa ka negusyante samtang grabe ang iyang anak sa aksidente sa dan sa Sityo Kampatok, Barangay Dalid, lungsod sa Tabuelan, amihanang Sugbo, alas 11:30 sa buntag, Biyernes, Hulyo 26, 2024.
Ang namatay giila nga si Vicente Pontillas, 52, minyo, negusyante, kinsa nagsakay sa sports utility vehicle (SUV) nga gimaneho sa iyang anak nga si Michael Pontillas, 25, ulitawo, pulos taga Purok Suba, Barangay II, lungsod sa Tuburan, amihanang Sugbo.
Sa imbestigasyon sa kapulisan sa Tabuelan ubos sa kamandoan ni P/Capt. Amory P. Napoles, ang mga biktima gikan sa Tuburan ug nagpadulong sa Brgy. Lugo, lungsod sa Borbon.
Usa ka dump truck nga gimaneho ni Richard Matugas, 27, minyo, taga Marmol, Tuburan, nag-una sa SUV padulong sa Barangay Poblacion, Tabuelan.
Sumala sa kapulisan, ang SUV ni-overtake sa dump truck apan giingong naalanganin o naapiki sa pagbalik sa lane hinungdang naigo sa dump truck nga niresulta sa pagkabangga sa duha ka mga sakyanan.
Ang mga biktima gidali sa pagtabang sa Municipal Risk Reduction Management Office (MDRRMO) sa Tabuelan ug gidala sa Tuburan District Hospital apan ang amahan nakabsan sa kinabuhi ug ang anak grabing naangol.
Ang drayber sa dump truck gikustodiya sa kapulisan sa maong lungsod. / DVG