Ambulansiya nalimbuwad; 1 patay, 3 samdan

Ambulansiya nalimbuwad; 1 patay, 3 samdan
NAGUSBAT: Ang ambulansiya nagusbat tungod sa kakusog sa impact sa pagkabalitok sa national highway sa Sityo Canca­inap, Barangay Tulic, lungsod sa Argao, ala 1:20 sa hapon, Huwebes, Hunyo 13, 2024. / DARIO V. GIL

Usa ang patay ug tulo ang nangaangol sa pagkabalintuwad sa ambulansiya sa national highway sa Sityo Cancainap, Brgy. Tulic, lungsod sa Argao, ala 1:20 sa hapon sa Huwebes, Hunyo 13, 2024.

Ang ambulansiya gipanag-iya sa Provincial Disaster Risk Reduction Management Office (PDRRMO) Zamboanga del Norte gikan sa dakbayan sa Sugbo naghatod og pasyente sa Vicente Sotto Memorial Medical Center (VSMMC).

Nasayran sa Superbalita Cebu nga samtang nagbiyahe pauli sa dakbayan sa Dipolog, Zamboanga del Norte agi sa nautical highway, pag-abot sa nahisgutang lugar, nibuto ang ligid sa driver’s side.

Sumala sa mga saksi, nalimbuwad og kaduha ang ambulansiya tungod sa kakusog sa dagan hinungdan nga grabe ang impact.

Ang mga lumolupyo sa dapit ug ang nakaagi nga mga motorista nagtinabangay sa pagpabarog sa ambulansiya sa dan.

Ang ambulansiya gimaneho sa usa ka ‘Victor’, 50, taga Brgy. Santa Isabel, siyudad sa Dipolog, nga usa sa mga samdan.

Laing nasamdan mao si “John”, 26, nurse, ulitawo, taga lungsod sa Manukan, Zamboanga Del Norte ug usa ka “Roel’, 28, ulitawo, responder sa Zamboanga del Norte, taga Baangay Biasong, Dipolog.

Apan laing responder nga si “Jules’, hamtong, taga Brgy. Biasong, Dipolog, gideklaarar nga dead on arrival sa Isidro C. Kintanar Memorial Hospital (ICKMH) sa Barangay Bogo, lungsod sa Argao.

Si Jules gikataho nga naghigda sa katri sa sud sa ambulansiya hinungdan nga wala makakupot atol sa aksidente.

Sa nakuhang kasayuran sa Superbalita Cebu sa interview ni Kent Rizon, pangulo sa Argao MDRRMO nga nangulo sa pag-rescue sa mga biktima nga gidala sa ICKMH, nga asoy pa sa nurse nga gikan sila naghatod og pasyente sa VSMMC.

Samtang nagdagan nibuto ang usa ka ligid sa atubangan.

Ang mga nangasamdan padayong giatiman sa ospital ug gipahibalo na usab ang ilang ospital sa Zamboanga del Norte. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph