Giduso sa Sangguniang Panlungsod ang pagdeklarar sa pipila ka kadalanan palibot sa Carbon Public Market isip usa ka “Ambulant Vendors and Mountain Products Landing and Night Market” aron matagaan og permanenteng pwesto ug maorganisar ang mga paninda sa dapit.
Ang maong gisugyot nga ordinansa, gipangamahanan ni Cebu City Councilor Mikel Rama, nagtumong nga mahatagan og pag-ila ang kapin 50 ka tuig nga night market operation ug pagdiskarga sa mga produktong agrikultural gikan sa kabukiran sa Sugbo.
Pinaagi sa paggamit sa Sections 16 ug 21(d) sa Republic Act 7160 (Local Government Code), ang maong hangyo maghatag og gahom sa dakbayan sa pagdeklarar sa night market zone.
Tungod niini, ang mga pwesto sa paninda nga sakop sa ordinansa dili na makonsiderar nga illegal obstruction sa mga gipahigayong road-clearing operations sa Department of Interior and Local Government (DILG).
Kon maaprubahan ang maong hangyo, ang gitakdang night market mag-operate matag adlaw gikan sa alas 5:30 sa hapon hangtod sa alas 6:00 sa buntag sa sunod adlaw.
Ilakip sa ordinansa ang paggamit sa bahin sa mosunod nga mga dalan alang sa night market trading area: Manalili Street, Plaridel Street, Lincoln Street, Progreso Street, F. Gonzales Street, M.C. Briones Street, F. Calderon Street, M.L. Quezon Street, ubang kadalanan nga gitudlo ubos sa Market Code sa dakbayan.
Dili itugot ang pagdiskarga o pagbaligya sa gawas sa maong mga oras gawas kon adunay espesyal nga resolusyon gikan sa City Council.
Aron maseguro nga mahan-ay ang pagpatuman sa night market zone, unahon paghatag og pwesto ang mga mag-uuma, farmers’ cooperatives, accredited producers, ug lehitimong mga tindero nga marehistro sa Cebu City Vendors Registration and Welfare Council ubos sa City Ordinance No. 2586.
Kada rehistradong tindero hatagan lang og luna nga dili molapas sa 2 meters by 2 meters.
Dili pwedeng ibaligya, ipasub-lease, o ibalhin sa uban ang pwesto sa night market.
Dili pwede ang pagtukod og permanente nga estruktura sa kadalanan ug gidili ang pagbabag sa mga fire exit, sidewalk, intersection, drainage canal, ug emergency lanes.
Obligado sab ang mga vendor nga magbutang og basurahan ug manglimpyo sa ilang lugar sa dili pa matapos ang oras sa night market.
Aron maseguro ang kaayuhan sa publiko ug dili makabalda sa trapiko, ang mga makalapas sa regulasyon mag-atubang og silot. / CAV