Nagtingkagol sa prisohan ang usa ka senior citizen nga langyaw nga giingong nanghasi ug nanghulga sa tulo ka mga menor de edad mga alas 4 sa Lunes sa hapon, Mayo 19,2025 sa usa ka condominium nga nahimutang sa Barangay Lahug, Dakbayan sa Sugbo.
Ang maong langyaw nailhan sa alyas nga Sham, 62, lalaki, nagpuyo sa maong condominium.
Samtang ang managsuon nga mga biktima nga sila si alyas Catty, 8, Grace, 7, ug Harvey 5, puros usab mga langyaw ug nagpuyo sa nahisgutang dapit.
Base sa imbestigasyon, ang suspek gidala sa security guard sa maong condominium ngadto sa Mabolo Police Station human giingong nangayo og pakitabang ang amahan sa tulo ka mga bata nga biktima sa gibuhat sa maong langyaw.
Atol sa pag-interbyu sa imbestigador sa mga biktima, nibutyag sila nga kalit lang nihulbot ang suspek og kutsilyo sa ilang atubangan sa may pool area ug matod nagpabuang-boang ug gisyagitan ang mga bata nga nakahatag nila og kahadlok.
Sa dugang pakisusi, gikataho nga ang suspek nanghulga nga patyon ang mga bata.
Nasayran nga tungod sa kahadlok ug trauma sa mga bata, nakadesisyon ang amahan nga ipapriso kining maong senior citizen.
Atol sa pagkutlo ning balita, gisuwayan og kuha ang habig sa maong suspek apan dili kini motingog ug gituohang adunay problema sa pangisip.
Gitanggong na karon sa Mabolo Police Station si alyas Sham kinsa mag-atubang og kaso sigon sa salaud nga iyang nabuhat. / JDG