Amro mipasiugda og konsiyerto para sa biktima sa katalagman

Local News Official
Local News OfficialSunStar File Photo

Ang All-terrain Medical Relief Organization (Amro), usa ka pundok sa mga boluntaryo, kadaghanan kanila mga doktor, nipahigayon og fundraising concert niadtong Dominggo sa gabii, Nobiyembre 26, 2023, sa IEC Convention Center sa Pope John Paul II Avenue, dakbayan sa Sugbo.

Ang pinili nga performers sa maong konsiyerto nga gitawag og “Sukli sa Gugma” miboluntaryo usab sa ilang talento ug panahon aron makatabang sa pagtigom og pundo nga magamit sa Amro sa pagtubag sa mga emerhensiya ug mga katalagman dinhi sa Sugbo ug sa ubang mga dapit.

Si Dr. Wyben Briones, inilang neurosurgeon sa Sugbo ug founder sa Amro, niingon nga ang pundo nga matigom gamiton usab sa pagpamalit og dugang nga mga relief supplies, medical equipment ug uban pang gikinahanglan alang sa mga relief operations.

Ang AMRO nahulma niadtong 2010 ug rehistrado isip usa ka non-stock, non-profit organization sa Securities and Exchange Commission ug sa Bureau of Internal Revenue. Kini adunay 170 ka mga sakop nga naglakip sa mga doctor ug ubang mga propesyonal.

Kadaghanan sa mga sakop mga off-road enthusiasts. Ang ilang mga off-road vehicles gigamit sa paghatod sa mga medical ug relief goods sa lagyong mga dapit nga di maabot sa ordinaryong mga sakyanan sa panahon sa katalagman sama sa linog sa Negros Oriental sa 2012, linog sa Bohol sa 2013, diin nahugno ang pipila ka mga taytayan busa di maagian sa mga sakyanan.

Aktibo usab ang Amro panahon sa Covid-19 pandemic sugod sa 2020, sa dihang nagnihit ang mga medical supplies, sama sa personal protective equipment (PPE) alang sa mga doctor, nurses ug mga first responders nga nalambigit sa pag-atiman sa mga pasyente nga dunay Covid.

Ang AMRO nanggama og mga PPE nga giapud-apod sa nagkalainlaing mga hospital sa Kabisay-an, Luzon ug Mindanao. Gawas pa niini, nitabang ang AMRO sa pagbakuna batok sa Covid sa mga lungsod sa isla sa Bantayan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph