NADAKPAN human gi-buy-bust ang drug personality nga naa sa target list sa PNP ug Philippine Drug Enforcement Agency (PDEA) alas 4:38 sa hapon, Miyerkules, Hunyo 11, 2025 sa Sityo Tulang Diot, Barangay Esperanza, Lungsod sa San Francisco, Isla sa Camotes, Probinsya sa Sugbo.
Ang dinakpan giila sa alyas nga si Roel, 53, usa ka mananagat nga residente ra usab sa maong lugar.
Nakuha sa mga operatiba sa PDEA Cebu Provincial Office sa pakig-alayon sa San Francisco Municipal Police Station ang 6 ka pakete sa gituohang shabu nga motimbang sa 30 gramos nga dunay estimated average market value nga P204,000 lakip na ang buy-bust money, cellphone ug ang usa ka timbangan sa ilegal nga drugas.
Matod ni Leia Alcantara information officer sa PDEA 7 nga usa ka semana nila nga gipaubos sa case buildup ang maong suspek human madawat ang impormasyon nga nalambigit kini sa pagpamaligya sa ilegal nga drugas.
Sa nakuha nga kasayuran nga makabaligya kini og 100 gramos nga shabu matag semana gikan sa iyang supplier nga maoy gisusi karon sa mga ahente sa PDEA 7.
Ang mga nakuhang ebedensya giduso na kini sa PDEA-7 Regional Office Laboratory alang sa himuon nga chemical analysis.
Giangkon ni Alcantara nga ang Barangay Esperanza gideklara sa Regional Oversight Committee on Barangay Drug Clearing nga drug cleared.
Apan ilang gipasabot nga di maapektohan ang status sa maong barangay isip drug cleared sanglit na-monitor man dayon kini sa Barangay Drug Abuse Council nga maoy naghatag sa impormasyon sa PDEA-7.
Giandam na ang kasong kalapasan sa Section 5, 11 ug 12, Article II, Republic Act 9165 ang ipasaka sa PDEA 7 batok sa maong suspek. / AYB