AMAHAN miunay og tigbas sa iyang 36 anyos nga anak nga lalaki nga gituohang hubog sa dihang pugos nga misulod sa balay sa suspek sa Sitio Ipil-ipil, Barangay Babag 2 bukirang dapit sa Dakbayan sa Sugbo alas 1:30 sa kaadlawon, Marso 15, 2025.
Ang biktima giila nga si Horace Celajes Montillana nga nakaangkon og samad tinigbasan sa ulo samtang ang suspetsado mao ra usab ang iyang amahan nga si Norberto, 73, pulos residente sa maong lugar.
Sa imbestigasyon sa Police Community Precinct sa Malubog gikataho nga hubog ang biktima nga misulod sa balay sa iyang amahan, nga natulog na niadtong higayona nga nanganti nga iyang patyon ang iyang amahan.
Apan sa dihang nipugos sa pagsulod sa kuwarto ang biktima, dali nga nakakuha og sundang ang amahan dayon gihapos ngadto sa iyang anak nga matod pa nagmaoy ug nasamdan sa ulo hinungdan nga grabeng nagkadugo.
GIBADLONG
Nasayran base sa inisyal nga imbestigasyon sa Malubog Police Community Precinct nga kanunay’ng mag-away ang biktima ngadto sa iyang amahan sa dihang kanunay kining pahimangnoan ug gibadlong nga undangon na ang dautang bisyo ilabi na sa illegal nga drugas.
Samtang ang mga silingan sa maong pamilya mitug-an nga sa higayon nga makainom ang biktima magmaoy.
Niadtong Biyernes sa gabii, Marso 14, 2025 nag-inom ang biktima sa ilang lugar ug pagkaala 1:30 sa kaadlawon nag-wild ang batan-ong Montillana ug misulod sa balay sa iyang amahan.
Ang amahan natulog sa sulod sa kwarto apan nipugos sa pagsulod sa balay ang biktima pinaagi sa pagguba sa pultahan kay matod pa buot niyang patyon.
Nakahigayon og kuha og sundang ang amahan nga gibanabana nga dunay gitas-on nga 20 ka pulgada nga diha nang daan sa sulod sa kwarto.
Gipaabot pa sa kapulisan ang biktima nga naa na sa luwas nga kahimtang kon mopasaka og kaso batok sa iyang amahan nga 73 anyos.
Gidala ang biktima sa tambalanan sa Dakbayan sa Sugbo samtang ang amahan nga suspetsado kasamtangan nga gitanggong sa Malubog Police Community Precinct. /AYB