Gipangkulata sa lokal nga mga residente ang anak ug pag-umangkon ni Senador Jinggoy Estrada samtang nagbakasyon sa Boracay Island kaniadtong Sabado sa buntag, Mayo 24, 2025.
Matod ni Estrada nga ang iyang anak nga si Julian, ug pag-umangkon nga si Jefferelly Vitug, padulong na unta sa ilang giulian gikan sa usa ka bar mga alas 2:25 sa kadlawon sa dihang ang tulo ka mga suspek, duha kanila ang nailhan, ning-ataki gikan sa luyo “sa walay klaro nga rason.”
Asoy ni Estrada nga ang usa ka suspek nisulti sa iyang pag-umangkon nga “Masyado kang maangas.”
Matod ni Estrada nga ang mga suspek gikan sab sa samang bar nga giadtuan sa iyang anak ug pag-umangkon apan walay komprontasyon tali kanila, ug nakumpirmar kini pinaagi sa CCTV footage sa bar.
Si Julian nakaangkon og hampak sa ulo ug natangtang ang kuko sa tiil tungod sa insidente samtang ang iyang ig-agaw nakaangkon og samad sa ilong.
Kasamtangan silang na-admit sa usa ka ospital.
Si Estrada dihadiha dayon nilarga sa Boracay ug nipasaka og kaso batok sa mga suspek. / TPM / SunStar Philippines