Suwayan na pag-ilog ni Filipino Jerwin Ancajas ang korona ni World Boxing Association (WBA) bantamweight champion Japanese Takuma Inoue karong gabii, Sabado, Pebrero 24, 2024, sa Ryogoku Kokugikan sa Tokyo, Japan.
Sa official weigh-in kagahapon, ang duha ka mga boksidor parehong yano nga nakakuha sa 118 lbs. weight limit.
Ang duha ka mga boksidor parehong nitimbang og 117.4 pounds.
Si Ancajas, kinsa kanhi International Boxing Federation (IBF) super flyweight champion, tataw nga nakabintaha kon kasinatian ug kusog ang hisgutan.
Hinuon, giklaro ni Ancajas sa sayong mga interbyo nga dili niya hatagan og luna sa iyang dughan ang pulong nga kompiyansa.
Sa iyang bahin, giangkon ni Inoue nga si Ancajas ang labing lisod niyang makontra apan dako ang iyang pagsalig nga modaug.
Si Ancajas naggunit og 34-3-2, 23KOs nga rekord samtang si Takuma, kinsa manghod ni undisputed super bantamweight king Naoya “Monster” Inoue naghupot og 18-1, 4KOs nga baraha.