Tungod kay wala pa’y klaro ang petsa kon kanus-a siya maka-challenge alang sa World Boxing Association (WBA) bantamweight title, nakadesisyon si Filipino Jerwin Ancajas nga mobalik lang una sa Pilipinas.
Si Ancajas, kinsa kanhi junior bantamweight world champion, nahibalik sa Pilipinas niadtong Sabado, Disyembre 2, 2023, kauban ang iyang manager-coach Joven Jimenez.
Nag-training si Ancajas sa US niadto pang Enero, 2023 hinungdan nga naghinamhinam na sab kining makauli.
Magpadayon og training si Ancajas sa ilahang “Survival Camp” sa Magallanes, Cavite samtang naghuwat kon kanus-a siya maka-challenge ni WBA bantamweight champion Japanese Takuma Inoue.
Niadto ra untang Nobiyembre 15, 2023, nakaeskedyul ang away nila ni Ancajas ug Inoue apan nauswag kini sa wala pa matino nga petsa gumikan kay nakasinati og angol sa gusok si Inoue atol sa iyang training.