Makigsangka si kanhi International Boxing Federation (IBF) super flyweight champion Jerwin Ancajas ni Thai journeyman Sukprased Ponpitak sa usa ka 10-round bout sa co-main feature sa Manny Pacquiao “Blow-by-Blow” boxing show karong Septiyembre 22, 2024, sa Mandaluyong Gymnasium sa Mandaluyong City.
Gikinahanglan kaayo nga modaog si Ancajas ning awaya aron makakuha siya og kahigayunan nga matul-id pagbalik ang agianan sa iyang karera.
Si Ancajas nasugamak sa tulo ka mga pilde sa katapusan niyang upat ka mga away.
Nahimong IBF super flyweight champion si Ancajas pinaagi sa unanimous decision nga kadaugan batok ni McJoe Arroyo niadtong 2016.
Lima ka mga tuig nga naggunitan ni Ancajas ang maong titulo nga iyang nadepensaan sulod sa siyam ka mga higayon.
Nabuhian ni Ancajas ang iyang bakus human siya napilde batok ni Fernando Martinez pinaagi sa unanimous decision niadtong 2022.
Sa ilang rematch ni Martinez nga gipahigayon sa ulahing bahin sa 2022, mao lang gihapon ang resulta.
Human niini, nisaka og timbang si Ancajas ug nakakuha og oportunidad aron mahimong 2-division champion apan napilde siya ni Takuma Inoue pinaagi sa 9th round knockout sa ilang World Boxing Association (WBA) bantamweight title fight niadtong Pebrero 24, 2024, sa Japan.
Sa edad nga 32, aduna pa’y igong panahon nga makasaka pagbalik si Ancajas sa ibabaw gumikan kay ranked. No. 8 man siya sa WBA ug No. 20 sa World Boxing Council (WBC).
Si Ancajas adunay 34-4-2, 23KOs nga rekord samtang si Ponpitak adunay 30-19, 20KOs nga baraha. / EKA