Makigtigi alang sa bakanteng Oriental and Pacific Boxing Federation (OPBF) light-flyweight belt ang one-time world title challenger nga si Ar Ar Andales batok sa batan-ong Hapon nga sensation nga si Raito Kataoka karong Oktubre 29, 2026, didto sa makasaysayanong Korakuen Hall sa Tokyo, Japan.
Ang 26-anyos nga si Andales niposte og lima ka sunodsunod nga kadaogan ug wala pa makatilaw og pilde sulod sa miaging unom ka tuig. Sukad sa iyang katapusang pilde niadtong 2019, nakatala si Andales og siyam ka kadaogan ug tulo ka tabla.
Kaniadtong 2024, iyang gipalukapa ang kanhi world champion nga si Rene Mark Cuarto, samtang nakigsangka usab siya sa ubang kanhi world champions nga silang Wilfredo Mendez ug Thammanoon Niyomtrong.
Naggikan si Andales sa unanimous decision victory batok ni Ramel Antaran sa usa ka keep-busy fight sa miaging Marso.
Sa pagakakaron, si Andales ranggo no. 9 sa International Boxing Federation (IBF) ug no. 13 sa World Boxing Council (WBC) sa light-flyweight division.
Sa pikas bahin, ang 20-anyos nga si Kataoka aduna pa lang duha ka pro fights, apan nagbitbit kini og impresibong 57-1 record sa amateur diin nakasakmit usab siya og gold medal sa 2023 Asian Youth Championships.
Si Andales naghupot og 19-2-3 record lakip ang walo ka knockouts, samtang si Kataoka adunay limpyong 2-0 slate nga pulos gitiwas pinaagi sa knockout. / EKA
