Sa kanunay nakong pagpangita sa social media og lain-laing dapit nga angay bisitahon alang sa sunod namong camping adventure uban sa akong hinigugma ug suod nga mga higala, nasangit ang akong atensiyon sa usa ka matahom nga lugar sa Negros Oriental. Layo sa kasaba sa siyudad, puno sa kahilom ug katahom sa kinaiyahan, haum gyud kini alang sa mga mahigugmaon sa gawasnon nga kinabuhi sama namo. Ang lugar gitawag og Ecoco.rocks, nahimutang sa Lungsod sa Sibulan.
Sama sa among naandan, kada piyesta sa Lungsod sa Barili, habagatang kasadpan sa Sugbo, kami managkot agi og halad ug pahinungod sa mga grasya nga among nadawat ug pagbalaan sa patron. Apan karong tuiga, among gihimo nga lahi ang plano. Human sa panagkot, nakahukom mi nga molabyog ug mosuroy padulong sa Ecoco.rocks alang sa usa ka overnight nga camping experience.
Niadtong miaging semana, human namo og panagkot, nitabok kami paingon sa Negros Oriental sakay sa four-wheeled nga sakyanan sa akong higala. Wala mi magmotor kay usa sa among kauban dunay gipamati ug dili angay pugson sa layo nga biyahe sakay sa motorsiklo.
Pag-abot namo sa Ecoco.rocks mga alas 2 sa hapon, gidawat kami sa usa ka talan-awong dili malimtan: dagko'ng mga bato’ng nag-igdal sama sa kadak-on sa usa ka balay, nga nagpatingog sa kahilom sa bukid. Gikan sa dapit, imong malantaw ang Dumaguete City, ang lapad nga Tañon Strait, ug ang silingang mga isla, usa ka talan-awong makaibog ug makaikag.
Apan ang labing makapahingangha mao gyud ang ilang infinity pool nga anaa sa daplin sa usa ka pangpang, murag nagalutaw sa kahanginan. Didto, samtang nagtampisaw ka sa kabugnaw sa tubig, makita nimo ang siyudad sa ubos nga murag usa ka laraw nga gihimo sa usa ka batid nga artista. Ang ilang comfort room taas ug limpyo nga gidesinyo alang sa kaharuhay sa mga bisita.
Dili sab ka maguol kon gutomon kay aduna silay café nga nagaserbisyo og mga pagkaon, kape, ug meryenda alang sa mga campers ug bisita. Ang entrance fee kay P200 kada tawo, samtang ang bayad sa tolda kon ikaw nagdala ug kaugalingon kay P200. Kon gusto ka mag-abang, adunay tolda nga P300 ang abang.
Gawas sa kaharuhay ug katahom, luwas sab ang lugar. Duna silay 24-oras nga guwardiya nga nag-duty sa shifting, busa dili kabalak-an ang seguridad. Tungod sa katahom sa dapit ug sa dako’ng kahayahay nga among nabati, naabtan mi sa kaadlawon nga naglingkod-lingkod, nagtan-aw sa kahayag sa bitoon, samtang ang bugnaw nga hangin sa bukid mihaplas sa among mga nawong samtang nangaligo sa infinity pool.
Naka-experience sab mi sa katugnaw sa kagabhion kay ang camping ground gilibutan sa lasang maong bugnaw ug presko ang palibot.
Sa among pagbiya, puno kami sa kalipay ug kasinatian nga dili makalimtan. Laing dapit nasuroy, laing handumanan nabuhat. Kon imong pangitaon ang dapit nga hilom, matahom, ug puno sa kahayahay, ang Ecoco.rocks sa Sibulan usa ka dapit nga angay gyud nimong bisitahon. Sa among kasinatian, ang Ecoco.rocks truly rocks! /