Sa iyang kalampusan sa 2025 World 9-ball Championship ning bag-uhay lang sa Jeddah, Saudi Arabia, si Carlo “Black Tiger” Biado nikulit og kasaysayan isip labing unang Pinoy nga naghari sa prestihiyusong torneyo sa billiards sulod sa duha ka mga higayon.
Una siyang nikampiyon ning maong kompetisyon niadtong 2017. Sa niaging tuig, nikampiyon sab si Biado sa World 10-Ball Championship.
Niini pa lang nga mga torneyo, makonsiderar na si Biado nga usa sa Filipino billiards superstars kauban ang magkumpareng sila si Efren “Bata” Reyes ug Francisco “Django” Bustamante.
Dili sama sa ubang dekalidad nga mga bilyarista sa Pilipinas, ulahi na’g gamay nagsugod pagkat-on sa pagdumbol ang kasamtangang 41 anyos nga si Biado, kinsa natawo niadtong Oktubre 31, 1983, sa Rosario, La Union.
Si Biado, kinsa kasamtangang nagpuyo sa Quezon City, nagsugod pagduwa og billiards sa edad nga 13, base sa wikipedia.
Niadtong higayuna, nagtrabaho siya isip caddie sa Villamor Air Base golf course unya nag-eskuwela pa sab.
Inig human sa iyang trabaho ug pagtungha, magduwa si Biado og billiards inig ka gabii.
Hangtod nga nakadesisyon siyang moundang pagtungha dihang first year high school pa lang siya.
Nagtutok na lang siya sa pagduwa og billiards, nga gihimo niyang panginabuhian pinaagi sa mga pustaanay.
Niadtong 2004, nahimong professional billiards player si Biado apan nilanat pa og dugay una siya nakabaton og mayorihiyang titulo.
Dihang naangkon ni Biado ang titulo sa 2010 Manny Pacquiao Ten-ball Championship, daw maghilak na ang tuig kon dili siya makalabni og korona hangtod nga hingpit na nga nigawas ang bangis sa Black Tiger. / ESL