Posible nga daghan ang nailad o nahaylo niadtong foreign national nga apil sa nangadakpan atol sa pagronda sa hotel-resort sa Lapu-Lapu diin adunay giingong Philippine Offshore Gaming Operator (Pogo) nga operasyon.
Ang mga awtoridad nakakuha og ID ni Shouqi Zhao nga gikatahong consultant alang sa Chinese Business Promotions sa kagamhanan sa Dakbayan sa Lapu-Lapu.
Ang naasoy nga ID adunay marka nga nasakop kini sa City Mayor’s Office sa maong siyudad.
Apan hugtanon nga gipanghimakak ni Lapu-Lapu City Mayor Junard ‘Ahong’ Chan ug way koneksiyon ang maong langyaw sa iyang buhatan ug daku ang iyang pagduda nga gikopya o replica lang ang maong ID.
Daghan ang posible nga rason nganong mokuha og peke nga IDs nga mamahimong magamit sa ilegal nga binuhatan sama sa mga mosunod:
* Identity theft magamit ang fake ID ilabi na sa mga magpaka aron ingnon o impostor nga usa ka indibiduwal sa katuyoan nga maka-access sa personal information o financial accounts.
* Illegal employment ilabi na niadtong way husto nga mga dokomento pinaagi sa ID kalikayan nga dili ma-deport sa lugar diin sila nanarbaho.
* Kriminal nga kalihokan - ang peke nga IDs mapahimuslan sa pag-abli og fraudulent bank accounts ingon man niadtong nalambigit sa scam.
* Pagbiyahe magamit sab kini isip travel documents nga nagtugot sa usa ka tawo nga makalabang sa borders sa ilegal nga paagi.
* Pagtago sa tinuoray nga identity ilabi na niadtong mga adunay tinagoan o illegal nga binuhatan.
Pipila lang kini sa mga kalihokan nga mahimo gamit sa peke nga IDs.
Si kinsa na kaha ang mga nabiktima ni Zhao, kon atong tuohan nga siya ug iya ang maong giingong peke nga government issued ID?