Nasugamak sa 5th round TKO nga kapildihan si Cebuano boxing prospect John Paul “Angas ng Cebu” Gabunilas batok ni Japanese prospect Kanamu Sakama sa undercard sa Inoue-Tapales super bantamweight unification bout ning Martes, Disyembre 26, 2023 sa Ariake Arena sa Tokyo, Japan.
Ang away giundang ni Japanese referee Koji Tanaka sa ika-2:35 minutos sa 5th round human gikulata na’g taman ni Sakama si Gabunilas.
Basi sa video nga nigawas sa social media, tataw nga nireklamo si Gabunilas kon nganong giundang sa referee ang away.
Sa sayong bahin sa 5th round, klaro nga natay-og na ang kalibutan ni Gabunilas ug pila sab ka higayon nga mogakos na lang kini ni Sakama aron makalikay sa mas dugang kastigo.
Si Gabunilas, kinsa sakop sa ARQ Boxing Stable, natagak sa 10-3, 7KOs nga rekord samtang si Sakama nisaka sa 9-0, 8KOs nga baraha.