PATAY na nga nadangat sa Toledo City Hospital ang 41-anyos nga babaye human malabay sa gisakyang motor ug nalatayan sa gikasugat nga Ten wheeler truck alas 11:10 sa buntag, Miyerkules, Hunyo 25, 2025, sa National Highway, Barangay Media Once, Dakbayan sa Toledo.
Ang biktima giila nga si Mitchelle Padwelan Paragoso, residente sa Barangay Poog, Siyudad sa Toledo.
Sa imbestigasyon sa kapulisan sa Toledo, nasuta nga nag-angkas ang biktima sa motor nga gimaneho sa iyang kaipon nga si Oliver Pescante Canlobo, 50, ug nagsubay sila sa National Highway.
Pag-abot sa Media Once kalit lang nga nasarasay ang ilang motor nga niresulta sa pagkalamba apan ang iyang kaipon nga si Mitchelle nalagpot ug napunta sa pikas linya sa karsada nga naatol sab nga nakasugat nila ang truck nga dunay plate number GAV 6282 nga walay karga nga gimaneho ni Edelito Oxillar Planco Jr., 35, taga Barangay Magdugo, Dakbayan sa Toledo.
Wala dayon maka-brake ang driver sa truck ug nalatayan sa ligid ang lawas sa biktima.
Dali nga gidala ang biktima sa Toledo City Hospital apan gideklarar nga dead on arrival sa mga doktor tungod sa dakong kadaot sa lawas. Kasamtangan nga gikustodiya sa Toledo City Police Station ang drayber sa ten wheeler truck nga si Planco ug giandam na ang kasong reckless imprudence resulting in homicide.
Sa laing bahin, duha ang naangol sa nahitabong dasmag sa public multicab ngadto sa nakaparada nga SUV niadtong alas 3:30 sa hapon, Martes, Hunyo 24, 2025, sa M.L. Quezon National Highway, Barangay Pusok, Lapu-Lapu City,
Giluwas ang drayber sa multicab gikan sa iyang pagkapiit sa sakyanan gumikan sa pagkapiyapi sa atubangan nga bahin niini human nilahos ngadto sa naka-hazard nga SUV daplin sa kalsada. Gidala sa tambalanan ang maong drayber aron nga magpaalim sa iyang samad. / dugang taho ni Denise P. Codis