
DAW naibtan og tunok sa dughan ang San Miguel Beermen ug ang Gilas Pilipinas human nasuta nga dili ra grabe ang pagkaangol sa Sugboanong higante nga si June Mar Fajardo nga iyang nasinati sa Game 1 sa Philippine Basketball Association (PBA) Season 49 Philippine Cup semi-finals series batok sa Brgy. Ginebra Gin Kings.
Hinuon, nagdepende na ni Beermen coach Leo Austria kon paduwaon ba dayon niya og balik si Fajardo o papahuwayon lang una niya kini.
Ang Beermen napilde sa Game 1, 71-73, ning best-of-seven series.
“According to our physical therapist, the doctors have noted tightness in June Mar’s calf muscles, but he is cleared to play,” asoy ni Beermen team manager Gee Abanilla nga napatik sa Spin.ph.
Gawas sa kampanya sa Beermen, si Fajardo moduwa sab sa Gilas alang sa FIBA Asia Cup 2025 nga ipahigayon karong Agusto sa Jeddah, Saudi Arabia. / ESL