‘Anomaliya’ sa merkado motibo sa pagpatay

KURAPSIYON SA MERKADO: Ipaimbestigar ni Mayor Junard Chan (nagsul-ob og shades) ang matod pa pagpanguwarta su’d sa merkado sa Opon. Si Pajo brgy. konsehal Jill Ceniza, (nag-face mask) asawa sa gipatay nga si market operations consultant Chris Ceniza, di katuo nga kaila ra nila ang gitumbok nga mastermind sa pagpatay sa iyang bana.
KURAPSIYON SA MERKADO: Ipaimbestigar ni Mayor Junard Chan (nagsul-ob og shades) ang matod pa pagpanguwarta su’d sa merkado sa Opon. Si Pajo brgy. konsehal Jill Ceniza, (nag-face mask) asawa sa gipatay nga si market operations consultant Chris Ceniza, di katuo nga kaila ra nila ang gitumbok nga mastermind sa pagpatay sa iyang bana. LAPU-LAPU CITY PIO

Gibutyag ni Lapu-Lapu City Mayor Junard “Ahong” Chan nga molusad og imbestigasyon sa giingong ile­gal nga kalihukan sulod sa merkado publiko sa Barangay Poblacion.

Kini nga mga kalihukan nag­lakip sa giingong “payola” o pagpanguwarta ug uban pang mga ilegal nga kalihukan sa merkado nga gidudahang motibo sa pagpatay sa market operations consultant Christopher Ceniza.

Matod pa sa mayor sa interbyo niadtong Lunes, Enero 22, 2024, nga ang imbestigasyon nagtumong sa pagsiguro nga ang mga indibidwal nga nagpaluyo sa mga ilegal nga kalihukan mag-atubang og kasong administratiba ug kriminal.

Wala mohatag og dugang mga detalye ang mayor apan naghisgot siya og pipila ka mga pananglitan, inay nga mosingil og tag-P400 ngadto sa matag vendor magsilbing abangan sa ilang stall, apan P500 ang panga­yuon niadtong nagpa­lu­yo sa maong kalihukan.

Butyag ni Chan nga nadiskubrehan ni Ceniza ang maong mga ilegal nga kalihukan ug nipasidaan sa mga nalambigit sa pag-undang sa maong binuhatan.

2 KA MASTERMIND

Niadtong Enero 22 ang kabanay ni Ceniza nga girepresentahan sa iyang asawa nga si Konsehal Jill Ceniza sa Barangay Pajo kauban si Chan ug ang Lapu-Lapu City Police Office (LLCPO), nipasaka og kasong murder batok sa lima ka mga suspek.

Naglangkob sa drayber sa gunman nga si barangay ta­nod Rodel Asuque Mojado ug Aldrin Peñaranda Dungog, middle man, nga usa ka job order (JO) worker sa Clearing Team Department, lakip ang gunman nga kasamtangang gitanggong sa custodial facility sa LLCPO tungod sa kasong ilegal nga drugas ug duha ka mga mastermind.

Matod pa ni Police Lt. Colonel Christian Torres, tigpamaba sa LLCPO ug hepe sa City Investigation and Detection Management Unit (CIDMU), gawas sa babaye nga utok, kinsa gikataho’ng usa sa mga department head sa Lapu-Lapu, nitug-an nilang Du­ngog ug Mojado nga aduna pay laing lalaki nga nalambigit sa maong krimen.

Si Chan niingon nga ang laing mastermind usa ka kaswal nga trabahante gikan usab sa Clearing Team Department ug nagtrabaho pa niadtong higa­yuna.

Matod niya nga iyang gitahasan ang City Administrator sa paghimo sa tanang administratibong proseso ngadto sa giingong suspek, lakip na ang pagtaktak kanila sa serbisyo.

Ang asawa ni Ceniza sa buwag nga pakighinabi nipadayag nga wa siya katuo nga mahimo sa mastermind ang pagpapatay sa iyang bana kay niadtong Dis­yembre 15 nanghuwam pa kini nila og kuwarta.

Nagtuo si Konsehal Ceniza nga gipatay ang iyang bana aron dili mabulgar ang ilang mga ilegal nga binuhatan diha sa merkado.

Gipaabot sa kapulisan nga kalutsan og warrant of arrest ang duha ka mga mastermind.

Si Ceniza gipusil patay sa nagmotorsiklo nga mamumuno niadtong Enero 5, 2024 samtang nangolekta og market fees ang biktima.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph