Ang politikanhong kahimtang sa Pilipinas nipakita na sab sa peligro nga resulta kon ang kahibawo gamiton nga walay integridad.
Ang kahibawo nga gituohan nga usa ka gamit sa pagserbisyo sa katawhan, mahimo sab diay nga hinagiban sa pagkontrol ug pagpanghimulos. Kini nakita nato karon sa kaso sa pagdelatar sa impeachment trial ni Vice President Sara Duterte.
Ang ilang gahum, kaalam, ug koneksyon gigamit aron hadlukon ug hadlangan ang hustisya.
Ang impeachment trial batok kang Duterte may kasangkot nga isyu sa confidential funds ug pagpanghilabot sa Department of Education (DepEd) nga panudlanan sa salapi.
Apan hangtod karon, walay lig-on nga lihok gikan sa Senado, ilabina gikan ni Senate President Chiz Escudero.
Sa iyang kahilom ug pagpangulob, nagpakita siya og taktika nga politikanhong panagang diin ang balaod gipasukad sa ilang personal nga interes ug dili sa hustisya.
Si Escudero usa ka batid nga abogado, edukado sa UP ug Georgetown University.
Apan imbes gamiton niya ang iyang kahibalo sa pagpangita sa kamatuoran, iyang gigamit kini sa pagkastratehista aron madugay ang proseso o dili na lang madayon kay ma-dismiss na lang, ug mamentinar ang ilang politikanhong alyansa. Ang iyang kahilom o paglanganlangan, o sa pagkawalay aksiyon – usa kini ka kalkulado nga pagpanghilabot o pagpanalipod sa personalidad ni Duterte dili sa pagpanalipod sa nasod gamit ang konstitusyon.
Dili lang si Escudero o sa ubang mga senador ang nalambigit sa sama niini. Sa Sugbo, si Governor Gwendolyn Garcia nipakita og susamang lihok. Bisan giila na sa Comelec ang kadaugan ni Pamela “Pam” Baricuatro, nisalikway si Garcia sa resulta. Bisan batid siya sa legal nga proseso, iyang gibaliwala ang kamatuoran sa iyang kapildihan sa niaging piniliay, nagpabilin siya sa gahum bisan sa iyang pagkasuspenso sa lain niyang kaso, ug gipakita niya nga ang balaod sayon rang balibalion kon ikaw adunay impluwensya.
Dayon niapil si Harry Roque, kaniadto respetado sa human rights ug international law. Karon, usa na lang siya ka tinubdan sa pagdepensa sa mga kontrobersyal nga buhat sa iyang mga kaalyado diha sa iyang pagtagu-tago sa balaod. Ang iyang kaalam gigamit sa pagtabon sa tinuod ug dili na aron protektahan ang mga katungod sa katawhan.
Silang Escudero, Garcia, ug Roque dili lang eksperto sa balaod—sila mao ang nagmanipula niini. Sa ilang kamot, ang balaod nahimong kasangkapan sa pagkupot sa gahum. Ang ilang kahibalo nahimong armas batok sa hustisya ug demokrasya. Kini usa ka hulga sa katawhan, labi na sa mga walay kahibalo o katungod nga mopakigbatok.