USA sa labing dagkong panagtigom sa sektor sa edukasyon sa tibuok nasod ang gipahigayon niadtong Hulyo 9-11, 2025, sa SMX Convention Center Manila diin kapin sa 100 ka mga presidente sa State Universities and Colleges (SUCs), mga campus director, lider sa Higher Education Institutions (HEIs), ug mga administrador ang nitambong.
Uban sa liboan ka partisipante, kining PASUC Midterm Convention ug General Assembly nagdala sa tema nga “Forging the Future: Empowering SUCs through Innovation, Sustainability, and Excellence.”
Ako mismo nakatambong niini isip usa sa mga representante sa akong unibersidad, ug mapasalamaton ko sa suporta sa pundo nga gihatag alang sa akong biyahe.
Sa unang adlaw (Hulyo 9, ang keynote address gilatid ni Hon. Amenah F. Pangandaman, Sekretarya sa Department of Budget and Management (DBM) diin iyang gipasabot ang papel sa edukasyon sa pagpalambo sa nasod ug ang paningkamot sa gobiyerno sa responsableng paggasto.
Gisundan kini sa Keynote Lecture 1 ni Hon. Marita R. Canapi, Komisyoner sa CHED, nga may tema “Redefining SUC Governance for Transformative and Innovative Higher Education” nga nipasiugda sa panginahanglan nga usbon ang mga pamaagi sa pamunuan sa SUCs aron kini mahimong innovative ug makaangay sa panahon.
Ang ikaduhang keynote lecture niadtong adlawa, Keynote Lecture 2, gihatag ni Hon. Shirley C. Agrupis, nga may titulo “Trends and the Future of Philippine Higher Education.” Sa iyang mensahe, iyang gihisgutan ang kasamtangang mga uso sa edukasyon sama sa paggamit sa teknolohiya, pagdagsa sa mga online learning platforms, ug ang pagpalapad sa access sa tertiary education.
Gipresentar sab ni Dr. Tirso A. Ronquillo, Presidente sa PASUC, ang taho kabahin sa mga kalampusan ug hagit sa asosasyon. Dayon, si Dr. Karol Mark R. Yee sa EDCOM2, naghisgot sa Plenary Session 1 kabahin sa Free Higher Education sa ilipinas—ang mga kalampusan ug angay pa nga buhaton alang sa kaugmaon.
Sa Adlaw 2 (Hulyo 10), gituki ni Hon. Pavit Ramachandran sa Asian Development Bank ang estratehikong pagpamuhunan sa edukasyon ug kahibalo. Gisundan kini ni Hon. Ethel Agnes Valenzuela, nga mipunting sa panginahanglan sa internationalization ug sustainability sa mga SUCs. (wilfredogubalaneanoos@gmail.com)