Anoos: Walay sulod nga saad sa mga Duterte

EDUKASYON PANID-AN TA
Published on

Wilfredo G. Anoos

Sa dugay’ng panahon, nabihag ang Pilipinas sa hawod ug hambugiro nga mga pinuno. Ug sa mga nanglabay nga tuig, walay lain nga pamilya nga nisikat niining estilo gawas sa mag-amahan ug anak — si Rodrigo Roa Duterte ug si Sara Duterte. Apan sa dihang huboan na sa entablado ang ilang mga pasundayag, mabatyagan dayon ang kabakakon ug kabus sa sulod sa ilang mga saad ug pamarug.

Unsaon pagkalimot sa 2016 nga saad ni Rodrigo Duterte nga sulbaron niya ang problema sa illegal nga droga sulod lang sa unom ka buwan? Kini nga saad nahimong dakong paon sa kampanya. Apan ang tinuod nga nahitabo, dili gubat batok sa droga, kon di gubat batok sa mga kabus. Liboan ang gipamatay, kadaghanan walay hustisya, samtang ang mga drug lord nagpabiling gawasnon. Paglabay sa katuigan, si Duterte mismo miangkon nga iyang gipakaubos ang kakomplikado sa problema. Ang resulta? Usa ka maduguon ug mapintas nga kapakyasan.

Laing pasalig mao ang iyang pasumbingay nga “magsakay siya og jetski” ngadto sa West Philippine Sea ug ituslob o i-ugsok ang bandera sa Pilipinas. Apan pagkahuman sa iyang termino, giangkon niya nga kini usa ra ka “joke.” Joke ba gyud ang pagbugalbugal sa soberanya sa nasod? Sa tinuod, ang iyang administrasyon misibog palayo sa pagkontra sa Tsina ug miduol pa sa pag-uyon niini.

Misunod usab ang iyang pasalig nga pataasan ang sweldo sa mga magtutudlo — usa ka emosyonal nga saad tungod kay iyang ginikanan mga maestro ug maestra. Apan ang tinuod, una pa nakadawat og dagkong benepisyo ang AFP ug PNP. Ang mga magtutudlo? Padayon sa pakiluoy, protesta, ug pagpaabot.

Mas grabe pa ang iyang pamahayag batok sa International Criminal Court (ICC) diin mihulga siya nga sagpaon ang ilang mga empleyado kon moanhi sa Pilipinas. Dili na kini yano nga political bravado, kon di usa ka seryoso nga panamastamas sa balaod ug kalibutanong hustisya. Gipakita niini ang pamatasan sa usa ka lider nga nagtuo nga siya lig-on sa tanang pikas ug dili angay manubag.

Dili sab malimod ang kinaiya ni Sara Duterte, ang iyang anak nga karon bise presidente. Ang iyang pasangil nga kon ipadayon ang impeachment batok kaniya, mahimong adunay “bloodbath” — usa ka makalilisang nga pamahayag nga nagbukas sa panglantaw nga ang gahum alang niya dili serbisyo, kon di pakigubat.

Ang iyang komento: "Give me? 100 million and I’ll solve DepEd’s problems," nasundan sa eskandalo nga naglakip og P122 milyon nga gigasto sa 11 ka adlaw nga halos walay klaro nga resulta. Sa taliwala sa kakulang sa mga classroom ug libro, kini dili lamang kakuwang sa hustong paggasto — kini usa ka moral nga kapakyasan.

Ang estilo sa mga Duterte nga puno og drama, hagit ug insulto, napalgan nga walay unod. Ilang gipahimuslan ang kasakit, kasuko, ug kahinam sa katawhan alang sa ilang kaugalingong interes. Apan ang ilang legacy? Dili kini kab-ot, kundi mga pulong nga walay igong buhat.

Panahon na nga ang ka­tawhan mopili og tinuod nga lider — dili artista sa politika. Ang entablado sa pasundayag kinahanglan na nga isira. Ang Pilipinas angayan og lider nga tinud-anay, epektibo, ug responsable. (wilfredogubalaneanoos@gmail.com)

Trending

No stories found.

Just in

No stories found.

Branded Content

No stories found.

Videos

No stories found.
SunStar Publishing Inc.
www.sunstar.com.ph