Gipirmahan sa Department of Education (DepEd) ang Implementing Rules and Regulations (IRR) sa Republic Act 10627, o ang Anti-Bullying Act of 2013.
Gituyo kini aron mahatagan og mas hait nga ngipon ang balaod sa pagpugong, pagsulbad, ug pagresolba sa mga insidente sa bullying nga mas klaro ug adunay manubagay.
Sa usa ka pamahayag, si Education Secretary Sonny Angara niingon nga ubos sa revised guidelines, ang tanang publiko ug pribadong eskwelahan sa basic education lakip na ang community learning centers ug mga eskwelahan sa gawas sa nasod ubos sa pagdumala sa DepEd, karon gikinahanglan nga mosagop ug mopatuman sa standard anti-bullying policy.
“Ang eskuwela ay lugar ng pagkatuto, hindi ng pang-aapi. Wala dapat puwang ang bullying sa kahit anong sulok ng ating mga paaralan at lipunan,” matod ni Angara.
Ang IRR naglakip sab sa mga programa sa pagpugong sa tibuok eskwelahan, sayo nga mga interbensyon, ug usa ka streamlined nga sistema para sa pagresolba sa mga reklamo ug apela.
Gipasiugda sab niini ang mga papel sa mga school heads, magtutudlo, ginikanan ug mga substitute sa ginikanan, ug bisan ang mga estudyante sa pagsiguro nga walay kaso nga mapasagdan.
Ang Learner Formation Officer (PDO I), usa ka staff member nga maoy magsilbi isip unang motubag sa mga reklamo sa bullying.
“Kailangan may kultura ng malasakit at respeto. At para mangyari ito, binibigyan natin ng malinaw na kapangyarihan at tungkulin ang mga guro, magulang, at school heads,” sumala sa kalihim.
Ang polisiya nagmando sa mga eskwelahan nga ilakip ang anti-bullying procedures sa ilang handbooks ug ipapilit kini sulod sa classroom.
Giingon ni Angara nga ang pagsulbad sa bullying usa ka kinahanglanon aron mapanindot ang academic outcomes tungod kay ang
ingon nga mga buhat kasagaran moresulta sa absenteeism, dili maayo nga performance, ug pag-undang sa pag-eskuyla.
“Walang bata ang uunlad kung araw-araw siyang takot pumasok sa klase. Kaya itong polisiya ay hindi lang para sa disiplina, kundi para rin sa kalidad ng edukasyon,” sigon niya. / TPM / SunStar Philippines