Hugot na nga gipatuman sa Traffic Enforcement Agency of Mandaue (Team) ang “Anti-Sardinas” policy nga naglimita sa gidaghanon sa mga nagtindog nga pasahero sa mga modern public utility jeepney kon MPUJ aron masiguro ang kaluwasan ug kaharuhay sa mga sumasakay.
Matod sa pangulo sa Team nga si Hyll Retuya niadtong Miyerkules, Agusto 6, 2025, gisugdan na sa siyudad ang pagpalig-on sa mga checkpoints alang niadtong mga MPUJ nga nagbiyahe sa mga dagkong ruta sulod sa Mandaue labi na kadtong kanunay nga mag-overload panahon sa peak hours.
Ubos sa maong polisiya, hangtod 10 ra ka mga pasahero ang gitugotang magbarog sulod sa MPUJ.
Ang mga drayber nga masakpan nga molapas sa limitasyon pagahatagan og Temporary Operator’s Permit (TOP).
“This is part of our mandate to support the national Anti-Sardinas policy of the Land Transportation Franchising and Regulatory Board (LTFRB), which aims to prevent extreme overcrowding in public transport,” matod ni Retuya.
Ang terminong “Anti-Sardinas” naggikan sa hulagway sa mga pasahero nga nagdasok sulod sa sakyanan, sama sa mga sardinas nga gipunsisok sa lata.
Ang Team nag-deputize og 10 ka enforcers nga gihatagan og awtorisasyon sa Land Transportation Office (LTO) aron mohatag og TOPs niadtong mga malapason.
“Bisan pa og ang uban nga LGU dili pa kaayo strict, kami sa Mandaue we will continue to implement this seriously for the safety of the riding public,” sumala ni Retuya.
Sukad sa pagsugod sa mas gipahugtan nga pagpatuman, usa na ka drayber sa MPUJ ang nahatagan og TOP gumikan sa sobra kadaghan nga nagtindog nga mga pasahero.
Sigon ni Retuya, ang hugot nga pagpatuman gituyo sab aron madisiplina ang mga drayber ug operator sa PUJ ug aron maminusan ang risgo sa aksidente.
Giawhag sab niya ang mga sumasakay nga i-report ang mga overloaded nga sakyanan sa opisyal nga Facebook page sa Team. / CAV