Araneta manuktok na sa World title

Araneta manuktok na sa World title
Boxing SunStar File photo

Nihatag na og kamanduan ang International Boxing Federation (IBF) aron mahan-ay ang rematch nila ni IBF light flyweight champion African Sivenathi Nontshinga ug Filipino Christian Araneta sa Omega boxing stable sa Sugbo.

Gitagalan sa IBF ang duha ka mga kampo hangtod karong Abril 4, 2024 aron magkasinabot sa pag-eskedyul sa away ug kon dili kini mahitabo, hayan moagi na kini og purse bidding.

Obligado si Nontshinga nga depensaan niya ang iyang korona batok ni Araneta sa dili pa moabot ang Mayo 4, 2024. Si Araneta maoy No. 1 contender ni Nontshinga.

Kon dili kini mahitabo, hayan ang Championships Committee and Board of Directors adunay katungod nga tangtangan og bakos si Nontshinga.

Kon dili sab maka-challenge si Araneta ni Nonsthinga sa gitagal nga petsa, hayan ang sunod nga challenger maoy ipuli sa gitawag og “The Bomb.”

Sa premirong panagsangka sa duha ka mga boksidor niadtong Abril 24, 2021 sa Gqeberha, South Africa, niposte og kontrobersyal nga unanimous decision nga kadaugan si Nontshina batok ni Araneta sa IBF world light flyweight title eliminator.

Ning awaya, nakapuntos og knockdown si Araneta sa 12th round.

Human ning awaya, naangkon na ni Nonsthinga ang IBF light flyweight title pinaagi sa split decision nga kadaugan batok ni Hector Calixto.

Nadepensaan ni Nontshinga kausa ang iyang titulo una kini nailog ni Mexican Adrian Curiel pinaagi sa 2nd round knockout nga kadaugan niadtong Nobiyembre 14, 2023.

Hinuon, nabawi ra sab dayon ni Nontshinga ang iyang bakos pinaagi sa 10th round TKO nga kadaugan sa ilang rematch ni Curiel niadtong Pebrero 16, 2024.

Sa iyang bahin, si Araneta nibangon gikan sa iyang kapildihan batok ni Nontshinaa pinaagi sa pagposte og lima ka sunodsunod nga kadaugan diin tanan niyang mga kontra wala nakatiwas sa away.

Si Nontshinga adunay 13-1, 10KOs nga rekord samtang si Araneta naggunit og 24-2, 19KOs nga rekord. / ESL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph