Nakabaton og mahinungdanong kasinatian ang Sugboanong si Christian Araneta nga iyang magamit alang sa iyang umaabot nga pagpanuktok alang sa world title sa labing unang higayon.
Kini human sa iyang pagpakig-sparring ni Japanese superstar Kenshiro Teraji ning bag-uhay lang sa Misako Boxing Gym sa Japan.
Si Teraji maoy kasamtangang naggunit sa World Boxing Council (WBC) ug World Boxing Association (WBA) flyweight titles.
Sa interbyu sa Sunstar Cebu, nagkanayon si Omega Boxing Gym headcoach Jinggoy Junco nga nindot kaayo ang nasinati ni Araneta sa pagpakig-sparring ni Teraji sulod sa lima ka rounds.
Si Araneta nakatakdang makig-away ni Thai Thanongsak Simsri alang sa inilugay sa bakanteng International Boxing Federation (IBF) light flyweight title karong Hunyo 19, 2025, sa Ota-City General Gymnasium sa Tokyo, Japan.
Naangkon ni Araneta kining maong oportunidad human sa tulo ka IBF light flyweight title eliminators nga iyang gisagubang.
Si Araneta adunay 25-2, 20KOs nga rekord samtang si Simsri naggunit og 38-1, 34KOs nga baraha. / EKA, ESL